Byrngem ka RBYF ban khang tala ia ka Umsohlait Police Station ba khlem larkar

Nongpoh, Jylliew 21 : Ka Ri-Bhoi Youth Federation (RBYF)-Mawhati Circle kala byrngem ban leit khang tala noh ia ka Umsohlait Police Station halor ka nongrim ba ka don hapdeng shibun ki jingdkoh kiba pynlong ba kan ym larkam ha kaban ai ka jingshakri ia ka imlang sahlang ka thain.

Kane ka Thanad kaba la dep ban plie naduh u snem 2017, haduh mynta kam pat don satia iala ka jong ka Ophis treikam ba pura bad la jan 6 snem, kane ka thanad kala treikam na ka iing shongwai jong ka Building ka Village Employment Council (VEC) ka Shnong Umsohlait kaba long tang 3 kamra.

Kane ka jingbyrngem ka RBYF-Mawhati Circle kala mih ruh halor ka jingiohi ba kane ka Thanad kam don satia ia ki Pulit kat kum ba dei ka rukom ne don ia ka bor pulit ba khlain, ki ban khmih ia ka shongsuk shongshngain jong ka dong ka thain.

Dang shen ka RBYF-Mawhati Circle kala phah da ka dorkhas sha ka Sorkar Jylla lyngba ka Deputy Commissioner ka Ri-Bhoi, kaba daw aba dei ban shna noh ia ka Thanad ba pura, ban pynbit pynbiang ia ki bor Pulit, ki jingdonkam ba donkam ha ka thanad.

“Haduh mynta, ka Sorkar kala sngap man man ia kane ka jingdawa jong ngi…Ngim banse ban shim rai ia ka rai ban shu leit khang tala lada ka Sorkar ka dang iai sngap mynthi” ong u President Bah Reynold Dkhar.

Kat kum ka jingong jong u, ka RBYF-Mawhati kam don jingpyrshah eiei ruh ia ka jingwan kane ka Thanad Pulit hynrei kaei kaba pynsngewkhia ka dei halor ka jingiehnoh bein jong ka Sorkar, kaba la shu wan plie ban pynkmen ia ki paidbah da kata ka kyrdan Police Station katba ka jingshakri pat kam pat iahap wat tang kum ki Police Outpost.

“Kiba bun ki kam kiba eh la hap ban wan shaduh Umsning Police Outpost” ula ong haa buh jingkylli ba kumno kat ka Police Station kan treikam na ki lai kamra ka Iingshongwai ka VEC Umsohlait.

Pule ruh: Hukum u Lat ban weng kam ia ki Nongtrei Sorkar bala kynjoh 70 snem