Shillong, Nailur 27: Ka Meghalaya Mine Owner and Exporters Association (MMOEA) kala byrngem ban mudui da ka mukotduma pynkhein hukum (Contempt Case) pyrshah ia ka Sorkar Jylla namar ka jingbym lah ban pyntreikam ia ka hukum ka Iingkashari High Court ban shna ia ka surok thymmai sha Borsora ka ban pynsuk ia ka khaii ka pateng.
Ha ka shithi bala phah sha u Chief Secretary ka Jylla Bah DP Wahlang, u President ka MMOEA Bah JC Diengngan ula ong ba ka Association kala leit sha ka Iingkashari ba kan bthah ia ka Sorkar Jylla ba kan thma thymmai/maramot ia ka surok ia ka surok ba sniew khamtam na Saw Number jong ka surok PWD na Borsora-Ranikor khnang ban pyllait ia ki nongtih par na ka jing hap siew khajna sha ki riew shimet.
U Bah Diengngan u pyntip ba ia kane ka mukotduma la pynwai ha ka 6 tarik Naitung 2022 ha ryngkat ka jingbthah ia ka Sorkar ba kan shim ia ka rai ha ka ban shna ia ka surok thymmai ban pyndonkam da ki riew paidbah ha kine ki bynta jong ka surok.
U Bah Diengngan ula ong ba naduh ba pynmih ia kane ka hukum, ka Association kala shu iai ap la arbnai hynrei la paw pynban ba ka sorkar kam i pyrwa eiei ruh em ia ka jingbthah jong ka Iingkashari.
“Namar kata, lyngba kane ka shithi, ngi kyrpad ia ka bor jong phi ban pyntreikam noh ia ka hukum jong ka Iingkashari lem kumta ka Association kam don lynti pat da kumwei hynrei ban leit biang sha ka Iingkashari bad ban mudui da ka mukotduma pynkhein hukum” ula ong ha ka shithi.
