Shillong Nailur 29: U Executive Member ka KHADC uba khmih iaka tnad Building Byelaw u Bah Paul Lyngdoh, hynnin ka sngi u la kren da kaba shai kdar, ba ka Council kan leh da kaba tyngeh katkum ka lynti jongka aiñ pyrshah ia kito kiba pynkheiñ iaka Building Byelaws ne ka Aiñ shna ïing.
“Nga ngeit skhem ba ki nongthaw aiñ, kim thaw tang ia ki aiñ hynrei ki pyntreikam ruh ia ki aiñ, kumta lada don kano kano ka jingtei be- aiñ hajan ki wah
La kadei ka Wahumkhrah ne Umiam ne kino kino ki Wah, ngi la don iaka Building Byelaws. Lada ki pynkhein kin hap ban mad iaka jingpynshitom katkum ka aiñ” ong u Bah Paul Lyngdoh hadien ba la dep lum iaka jingialang kaba nyngkong eh jongka Khasi Hills Building and Structure Regulatory Authority (KHBSRA) kabala long hynne ka sngi.
Ha ka lah sngi u Blei, ka Meghalaya High Court kala pynmih iaka hukum ha ka jingtian bishar iaka PIL ha kaba iadei bad ka jingkhuid jong ka Pung Umiam bad kala bthah iaka sorkar jylla bad iaka KHADC ban leh da kaba tyngeh pyrshah ia kito kiba la shna be- aiñ ia ki jingtei hajan ka Pung Umiam.
La ai notis ia u Bah Philosopher Iawphniaw, uba long u trai jongka Moon View Café bad iaka B Khongwar, kaba dei ka trai jongka Ever Banalari (Restaurant cum Guest House) hadien bala shem ba kitei ki jingtei ki long kiba be- aiñ bad kibym shim la ioh jingbit.
Haba kylli, kaei ka sienjam kaba ka Council kan leh pyrshah ia kitei ki jingtei be- aiñ, u Bah Paul Lyngdoh u la ong, ba kin sa leh ia kaba donkam da kaba bud ryntih iaka Meghalaya Building Byelaws, 2021 bad iaka hukum kaba la pynmih daka High Court halor katei ka mat.
“Ngan sa khmih bniah iaka hukum, hynrei nga pynthikna pat ba ngin jam sha katei ka mat kaba kongsan, kaba don bun ki jingduna, bun ki jingpynkheiñ haka jingtei iaki ïing ne ki jingtei kiba iadei ha ka khaii pateng kiba la mih hajan ki wahduh ne wat hapdeng jongki Wah. Kitei baroh kila wan sha ka jingtip ka jong ngi bad mynta ka sngi, ngi la lum ia kitei ki jingduna baroh namar ka jingbym don iaki kyndon aiñ bad mynta ngin sa shimkhia bad ban leh ia kaba donkam naka liang jong ngi” ong u Bah Paul.
U la kyntu iaki Dorbar Shnong ba kin ai ka jingiatreilang bad ka Council bad kila don ki Dorbar kiba la iaid shakhmat ha kaban ai Building Permission ne jingbit ban tei iaki ïing bad kane ka long kaba bakla jur.
“Katei kan buh haka jingeh kaba khraw ia u briew, uba la soi ia katei ka jingai jingbit, lada jia ba katei ka jingtei ka khyllem” la maham u Bah Paul.
Ula ong, dei ki bor kiba dei khmih kiba lah ban shim iaka jingitkhlieh halor katei katkum ka bor kaba la pynkup ia ki lyngba ka Meghalaya Building Byelaws, 2021 kaba la mynjur daka sorkar jylla bad ka ïing dorbar thawaiñ ka jylla.
U Bah Paul ula ong, ha kaba nyngkong ki paidbah kila kyntait bad pyrshah ban don iaka bor ba dei khmih halor ka jingtei iaki ïing hynrei mynta ula ioh pdiang bun ki jingujor halor ka jingmih jong kiba bun ki jingtei kiba la pynthud pat ia kiwei kiba don mar syndah.
“Ha ka ba nyngkong ki paidbah ki kyntait bad pyrshah ban don ka bor khmih, hynrei mynta, nga ioh pdiang ia ki jingujor halor ka jingmih jong ki jingtei kaba la khanglad ia ki marjan marpa pat ban ioh iaka hok ban ioh iaka sngi ne ka lynti ïaid ne ban ioh ban pynrung iaka kali sha ka jaka sah. Lada ym don ki bor khmih kan long kum ka jingailad ban don ka jingsynshar riewkhlaw ha kaba baroh ki lah ban leh katba mon, katkum ka jingkwah jong kiba don iaka bor, katba ki bym don bor kin kylla kum ki lanot hynrei ngin ym lah ban ailad ba kan jia kumtei” ong u EM uba khmih iaka Building Byelaw.
Lah ban kdew, ba la dep ban pynbna ba ki Autonomous District Council ki dei ki bor khmih ban pyntreikam iaka Meghalaya Building Byelaws, 2021.
U Bah Paul ula ong, ka KHADC kala pyntreikam ia katei ka bor bad ha kum kane ka por ba ka don ka jingkiew jong ka kam jngohkai pyrthei bad kiwei ki shnad kiba don bynta lang, kumta ka long kaba donkam ban pyrkhing iaka jingshna ia kino kino ki jingtei.
“Mynta ka council kam don shuh da kawei pat ka lad hynrei ban iaid shakhmat ban pyntreikam iaka Building Byelaws. Ai ba ngan pynshai ia kane sha baroh da kaba shai kdar, ba yn ym don ba lah ban shna palat pud ia kino kino ki jingtei, Building, Homestay, Hotel bad kiwei da kaba pynkheiñ iaka Building Byelaws” ong u Bah Paul.
Ki jingtei kiba hap ban ioh iaka jingbit shwa ban tei ia ki, ki kynthup ia ki ïing paki dulan, ïingsah kiba heh, ki ïingsah kiba kyrpang, ki jaka pule, ki jingtei kibaiadei bad ka khaïï pateng, ka koit ka khiah, ki jingtei jongka sorkar, ki jaka mane Blei ia kaba yn ym shim ia kano kano ka khajna, ki jingtei iaki karkhana, ki kudam heh bad ki jingtei kiba lah ban buh haka jingma ia kiwei.
Ula pyntip, ba ka bor kaba dei khmih kala sdang ban pyniaidshakhmat ia ki kam ki jam bad iaki phom ban pan jingbit lah ban ioh na kamra shwa ban rung shapoh jongka Council kaba don ha Shillong, Nongpoh, Nongstoin bad Mawkyrwat.
Ula iathuh ba ka tnad Bulding Byelaw kala dep banai jingbit ia ki 400 tylli ki aplikeshon kiba la wan pan jingbit.
“Haduh mynta ka sngi, ngi la dep ban ai jingbit iaki 400 tylli ki aplikeshon jong ki briew kiba don iaka jingthmu ban tei iaka ïing bad kiba donkam ban shim iaka ram na ki Bank bad kila dep ban ioh iaka ‘Letter of Recommendation na katei ka tnad” ong u EM uba khmih iaka Building Byelaws.
U la iathuh ba ha ka tnad Building Byelaws ki don ki nongtrei kiba la pyntbit ialade haka lain engineering, ka kynhun ki engineer haka lain Technical, ki nongaibuit haka ain ka kanun, ki nongaibuit kiba la shemphang ha ka
Building Byelaws kaba la shim na ka MUDA, Member Secretary uba long ruh u Joint Secretary ubakhmih iaka Building Byelaws.
