Tur paidbah sha Rynjah Police Station ba shah khot hajir u General Secretary
Shillong, Risaw 14 : Ka seng Hynniewtrep Youth Council (HYC) kala byrngem ban sa thad madan ia baroh ki kyrteng jong ki heh ki hain bad ki Pulit ka Jylla, kiba donkti ha ki kam khaii droks ne iarap ia ki nongkhaii droks.
“Kan sa poi ka por ba ka Seng kan sat had madan ia ki kyrteng ki heh ki hain ne wat ki Pulit kiba donkti ha ka kam khaii droks ne iarap ia ki nongkhaii droks hapoh ka Jylla Meghalaya jong ngi” ong u President ka HYC samla Roykupar Synrem.
Une u Nongialam ka HYC ula kren ia kane ha ka jingleit synran ia u General Secretary samla Isaac Basaiawmoit, uba la shah khot hajir hynne ka sngi Nyngkong ha ki Pulit ka Rynjah Police Station namar ka jingkhynra bad jingkem nongkhaii droks ha u bnai bala lah.
Lah ban kdew ruh ba ha 1 tarik Nailur, ka HYC kala iohkem ia 3 ngut ki nongkhaii droks ha Rynjah bad ki Pulit haba ioh jingtip, kila leit sha kane ka jaka ban tuklar bad shimti ruh ia kine ki briew ha ryngkat bad u droks, uba ka HYC ka thmu ban thang. Namar ka jingbym poi sha ka jingiasngewthuh jingmut, ki Pulit kila kyntait syndon ban shimti ia kine ki nongkhaii droks.
Ia u samla Isaac la pynngat ha ki 4 tylli ki kyndon ain kat kum ka ejahar bala mudui da uwei u Sub Inspector jong ka Rynjah Police Station.
Halor kane, u President ka HYC ula ther tyngeh ia ki bor Pulit bad ong ba kane ka jingpyrshang ban pynngat kyndon ain ia ki Nongialam ka Seng kan ym pynkynran dien ne pyntroin satia ia ka jingthmu jong ka Seng, ban rat dyngkhong ia u droks napoh ka imlang sahlang.
“Kane kan nang ai mynsiem shuh shuh ia ki nongialam bad ki dkhot ba kin trei shitom ha ryngkat ka jingkyrshan lang jong u paidbah” ula ong.
Na ka liang jong ki Longkmie kiba leit synran ia u samla Isaac Basaiawmoit ruh, kila kynthoh jur ia kane ka jingkhot hajir bad ong ba lada ki Pulit ki leh kumne ia ki Nongialam Sengbhalang kiba mih ban iakhun pyrshah ia u droks, kane kan ai mynsiem bad pynshlur shuh shuh ia ki nongkhaii droks ban pynrung ia u droks ha ka imlang sahlang.
 kala byrngem ban sa thad madan ia baroh ki kyrteng jong ki heh ki hain bad ki Pulit ka Jylla, kiba donkti ha ki kam khaii droks ne iarap ia ki nongkhaii droks.){kind=link}