Shillong, Nohprah 23: Ka seng Hynniewtrep National Liberation Council (HNLC) kala byrngem ban khang dam ia baroh ki temple jong ki Hindu lada ka Katumba Surakshya Parishad (KSP) ka nud ban pakhang ia ka surok ha ka jingdawa ban plie ia ka krem Mawjymbuin ban lehniam ki Hindu.
Ha ka kyrwoh ba pyllait hynne ka sngi Nyngkong, u General Secretary-cum-Publicity Secretary ka HNLC Bah Sainkupar Nongtraw ula ong “Ka jingbyrngem pakhang surok bad ka jingkynshoit sngew iapher niam ka KSP kan ym pyntieng ia ngi. Hynrei, ki pynpaw pyrthei ïa ka jingthmu ba shisha jong ki: ban pynsaphriang ïa ka jingshun, ban pynmih ïa ki jingïakynad ha ka jaitbynriew, bad ban pynduhjait ïa ka jinglong trai jong ka jaidbynriew Hynñiewtrep.”
“Lad aka KSU ka nud ban pakhang surok ban dawa plie biang ia ka Krem Mawjymbuin, ka HNLC ka ai ia ka jingbyrngem kaba tyngeh, baroh ki temple ki Hindu ki dei ban khang dam. Lad aka KSP ka pyrshang ban pynkhie ia ka jingkynad sngew iapher, kan sa sakhi ia ka bor ba pura jong ngi ban pynbeit kam. Ai ba kan long kaba shai-lada ki temple ki dang iai plie, ngin pynthikna ba kin jot rathai. Lada ki kwah ban pynbitar, kin sa iohi ia ka jingialeh pyrshah kaba shisha kumno ka long. Ai ba kin tip ba ki paid Hynniewtrep kin ym kynrandien da ki jingkyrshan ki briew ba nabar ban pyni bor ha ka jaka jong ngi” ula ong.
Haba pynrem ia ki jingkynthoh aiding bad jingbyrngem ka KSP, u Bah Sainkular ula ong “Kane ka jingwan tuklar ba khlem nongrim ha ka bri jong ngi ka dei ka jinghiar thma ia ka jinglong trai ri jong ngi, ka kolshor bad ka hok jong ki trai ri trai muluk kane ka jaka”.
Ula ong ba ki paid Hynniewtrep kila dei ki nongri nongsumar ia ka krem Mawjymbuin da ki pateng la pateng, hashuwa ba kino kino ki briew ba nabar kin kam ia kane ka jaka kum ka jaka lehniam. Ka Dorbar Shnong Mawsynram hapoh ka Khasi Customary Law, kala pyntreikam ia la ka bor ban iada ia ka jinglong kyrpang jong kane ka jaka. Ai ba kan long kaba shai, yn ym don ki bor ba nabar, ki seng sain pyrthei ne niam, kiba don hok ban batai kumno ngin pyniaid ia ka jaka kyntang jong ngi.
