Tuid da ki spah ngut ki paid Khasi bad Garo sha ka jingialang paidbah
Nongstoin, Iaiong 09 : Ki paid nongshongshnong ka Langpih Sector, kila byrngem ban pynlong da ka jingiakhih paidbah bad ban wan tur sha Secretariat, Shillong, lada dang pynslem ban pynbeit noh ia ka jingiakajia khappud hapdeng ka Sorkar Assam bad Meghalaya.
Kane ka rai kala mih na ka jingialang paidbah bala pynlong da ki nongialam ka Raidmynsaw hynne ka sngi Balang ha phyllaw ka Raidmynsaw Upper & Secondary School, Langpih. Ha kane ka jingialang la wan iashimbynta ruh da ki spah ngut ki paid Khasi bad Garo na ki shnong bapher bapher ka Langpih Sector kiba kwah ban don sha Meghalaya.
Na ki riewsain pyrthei kiba la poi sha ka jingialang ki kynthup ia u MDC ka Rambrai Jyrngam Bah Lurshai Kharbani bad u MLA/MDC barim Bah KP Pangniang. Ki Sordar na ki shnong bapher bapher kila iapoi lang sha kane ka jingialang.
U Chairman ka Raidmynsaw Bah Hindro Samakha uba dei ruh u dkhot ka Regional Committee on Boundary Dispute ka West Khasi Hills, ula pan ia ka jingiatreilang jong ki paidbah ka thain ban phang khang lut noh shuwa ia baroh ki kam pynroi kiba wan na Assam katba ym pat lah ban pynbeit thikna ia u pud u sam.
Jan baroh ki nongkren kila pynsngew ia ka jingdonkam ban iatylli bad ban klet noh ia ka jingsngew iapher na ki kam elekshon hynrei ban iatreilang noh na ka bynta ban ioh noh iala u jong u pud u sam ba thikna.
Kane ka jingialang kala rai ban phah da ka jingthoh sha u Myntri Rangbah ka Jylla Conrad K Sangma ba un pynsngew sha ka Sorkar Assam ia ka jingdawa u paidbah ban pynbeit noh ia u pud u sam ka Langpih Sector.
Lah ban kdew hangne, ki arngut ki Myntri Rangbah ka Jylla Assam Himanta Biswa Sarma bad u Conrad K Sangma, kila hiar jurip sha Langpih ha ka 16 tarik Naiwieng 2022 bad iakynduh ia ki paidbah. Kine ki Myntri Rangbah kila ai ka jingkular ba ki ar Jylla kin sa pynbeit noh ia u pud u sam.
