Shillong Nailar 04: Ki Nonghikai Kontrak kiba don hapoh ka lama jong ka Meghalaya Government Lower Primary School Teachers Association (MGLPSTA), kila byrngem ban pynlong noh da ka jingiakhih hadien ka jingbym seisoh ka jingiakren bad u Myntri Rangbah ka Jylla Conrad Kongkal Sangma ba long hynne ka sngi palei.
“Ka jingiakren jong ngi bad u Myntri Rangbah kam shym long satia kaba seisoh bad u Myntri Rangbah ula kren da kaba shai kdar ba ka Sorkar Jylla kam lah ban iarap ia ngi ki nonghikai Kontrak” pyntip u Bah Birbor Riangtem, President ka MGLPSTA hadien ka jingiakynduh bad u Myntri Rangbah.
Kat kum ka jingong jong u, “Kane ka dei ka jingiakynduh kaba hynriew sien bad u Myntri Rangbah hynrei kam shym la poi shano shano ruh kat kum ka jingdawa jong ngi. Ngi (Nonghikai kontrak) la long kum ka masi kaba shah ialam sha ka jaka ot doh” haba bynrap “Ngin sa lum ia ka jingialang bad ngin sa pynbna ia ki lynti jingiakhih”.
“Ka jingsngewnguh kaba ka sorkar MDA ka ai ia ngi ka dei da kaba phah thiah madan bad ban thad burom bad ia mynta hi ngim pat lah ban pynbna eiei hynrei ngin sa shong jingialang” ong u President ka MGLPSTA.
Une u Nonghikai ula kynnoh “Ka jingpynslem jong ka sorkar ban pynlong ia ka eksamin MTET haduh khyndai snem ka dei kaba la pynjot ia ka jingim jong baroh ki nonghikai kontrak ki bym don lad shuh ban phai shano shano ruh”.
Haba batai bniah ia kane, ula ong ba ki Nonghikai kontrak kila pyndep iala ki jong ki kam bala bynshet hynrei dei hadien ba ka NCTE kala pynmih ia ka kyndon jingbthah ha ka 23 tarik Nailar 2010 ba hap pass ia ka MTET, ka Sorkar Jylla kala pynslem ban pynlong ia kane ka eksam haduh u snem 2019, kaba shimpor haduh 9 snem.
“Ka jingaikam kontrak ia ki nonghikai ka dei tang 59 sngi hynrei ka sorkar kala ai ban bteng haduh 15 snem bad ki nonghikai kim shim la pan ban pynthymmai ia ka kontrak hynrei kadei hi ka sorkar kaba phah ban pynthymmai” ula ong.
Haba kylli balei kim shim la pynkhreh bha ialade ban pyndep iaka eksamin MTET, u President ka MGLPSTA u la ong, “Ka jingpule kot bad ka kam kaba ngi trei kam iahap satia…ki don ki nonghikai kiba hap ban iaid kjat ha nongkyndong haduh 3 ne 4 kynta bad ha ka por ba leh MTET ka dei ruh ka por ba don ki eksam. Ngin pynleit jingmut iaka eksamin kaba ki khynnah kidei ban leh ne ngin pynleit jingmut ia ka eksamin MTET”.
U la ong, ki nonghikai kila kyrpad ia ka sorkar ba kan peit kyrpang na ka bynta kito ki nonghikai kiba la heh ka rta hynrei ka jubab kaba kila ioh ka long ba ka sorkar kala pynpaw ba kan ym lah ban iarap satia ia ki.
