Shillong, Nohprah 08 : Ka Jaintia National Counci (JNC) kala pynbna ban pynlong ia ka jingiakhih paidbah hakhmat ka Ophis u Deputy Commissioner ka East Jaintia Hills la 10 tarik Nohprah, ban pyrshah ia ka jingthmu seng karkhana dewbilat ka Shree Cement Ltd ha shnong Daistong.
Ia kane ka jingiakhih la pynlong halor ka jingkynnoh ba ka Sorkar kam shym la leh eiei pyrshah ia ka jingkynnoh die jaka beain ia ki jaka ki riewlum sha u bar jylla kaba pynkheiñ iaka Meghalaya Transfer of Land Regulations Act, 1971.
Ia kane ka rai la shim ha ka jingialang jong ka Central Executive Committee (CEC) ka seng ba long ha ka sngi Nyngkong.
Ha ka kyrwoh lyngba ka dur khih, u President ka JNC Sambori Lyngdoh ula ong “Ngi la shim ia ka rai kaba shai kdar. Kumba ngi la maham dang shen, lada kam don ka jingshimkhia na ka Sorkar hadien ba ngi la aiti ia ki jingujor, ngin ym shu shong kli kti bad ngin pynlong da ka jingiakhih syndon”.
Ka JNC kala phah ia bun tylli ki jingujor sha ki Ophis bapher bapher ka Sorkar kynthup sha u Deputy Commissioner ka East Jaintia Hills, ka Meghalaya State Pollution Control Board (MSPCB), ka SEIAA),Chief Executive Member (CEM) ka KHADC, Commissioner ka Land Revenue & Disaster Management, hynrei la pyntip ba haduh mynta kam pat ioh ktien eiei na kine ki Ophis.
“Ngi kyntu ia ki nongshongshnong ka thain-khamtam ki paidbah ka Daistong bad ki shnong ba marjan kiba shah ktah ha kane ka jingtyrwa ka Shree Cement-ba wat tieng bad wat sngew jynjar. Ka JNC ka iengskhem bad phi. Wan ban iasnohkti lang bad ngi ha ka 10 tarik Nohprah” ong u Bah Lyngdoh.
Ka JNC ka la pynbna ia ka jingiakhih paidbah kaba heh ha ka 10 tarik une u bnai December 2025, hakhmat ka ophis u Deputy Commissioner ha Khliehriat. Ka jingiakhih kan kynthup ia ki placard, ki jingkren, bad ka jingialang paidbah jong ki nongkyrshan.
“Ngi kyntu ruh ïa ki paidbah ha kylleng ka East Jaiñtia Hills ban “sngewbha kiar na kaba kynnoh ïa iwei na iwei ne pynpaw ïa ki jingeh tang ha ki social media. Pyni ïa ka jingieid jong phi ïa ka khyndew ka shyiap jong ngi ym tang lyngba ka online, hynrei sngewbha to mih shakhmat bad kyrshan ïa kane ka mat ba kongsan kaba ktah ïa ka imlang sahlang jong ngi, ka khyndew ka shyiap jong ngi, bad ka lawei jong ngi” ula ong.
 kala pynbna ban pynlong ia ka jingiakhih paidbah hakhmat ka Ophis u Deputy Commissioner ka East Jaintia Hills la 10 tarik Nohprah, ban pyrshah ia ka jingthmu seng karkhana dewbilat ka Shree Cement Ltd ha shnong Daistong.){kind=link}