Nongpoh, Nailur 13 : Ka Joint Action Committee (JAC) against Casino in Ri-Bhoi District, kala byrngem ban pynlong da ka jingiakhih ba tyngeh namar ka jingkren pynartatien jong u Myntri ka Tnad Khajna ka Sorkar James K Sangma halor ka jingthmu ban buh iaka ktem khalai Casino ha ki jaka khappud jong ka District.
Kat kum ka jingong ka JAC, kane ka jingpynartatien kala mih na ka jingkren jong Myntri ha Iingdorbar Thaw Ain ba kam ba ka ktem Khalai kam don jingktah ia ki Trai Shnong ka Jylla namar ka Ain ka don ia ka kyndon kaba la kren shai ba yn ym shah ia ki trai shnong ban rung ha ki jaka khalai lait noh tang ki briew kiba wan na shabar ka Jylla.
“Ka jingkren u Myntri ka pynartatien bad ka mut ruh ba ka Sorkar ka thmu ban pyniaid beit shakhmat ha kaban buh ia ka ktem khalai Casino hapoh ka District” ong ki Nongialam ka JAC.
Haba iakren bad ki lad pathai khubor, u Bah Ferdinald Kharkamni Nongialam ka JAC bad President ka KSU-North Khasi Hills ula ong ba ka JAC ka pyrshah jur ia kane ka jingthmu ka Sorkar bad kan ym pdiang ruh da lei lei ia kata ka kyndon Ain bala wanrah da ka sorkar ban khang tang iaki Trai Shnong ha ka Meghalaya Regulation of Gaming Act, 2020-2021.
Ka JAC kala shong ia ka jingialang ba kyrkieh hynne ka sngi halor ka jingkren u Myntri James K Sangma ha Iingdorbar bad da kawei ka sur, kila pynrem ia ka jingkam u Myntri ba kane ka ktem khalai kan ym ktah ia ki Trai Shnong hynrei kan ai pynban ia ki jingmyntoi kum ha ka iohkam iohjam bad kiwei kiwei.
“Ngi sngewkhia ban iohi ba ka Sorkar ka dang thmu ban pyniaid shaphrang ia ka jingbuh Casino bad kala long da khongpong na ka jingkular jong u Myntri Rangbah ka Jylla Conrad K Sangma uba la ong ba ka Sorkar kan pynsangeh shuwa ia kane ka jingthmu namar ka jingieng pyrshah jong ki kynhun bapher bapher” ong u Bah Ferdinald.
Une u Nongialam ka JAC ula ong baka jingkren u Myntri ha Iingdorbar kala paw shai ba ka jingthmu ka dang iaid shakhmat. “Ngin ym pdiang da lei lei ruh ia ka Meghalaya Regulation of Gaming Act namar la wanrah ia kane ka Ain khlem da pynsngewthuh paidbah bad kiwei kiwei” ula ong.
Halor ka jingkdew u Myntri ia ka kam khalai na ka iadur masi, iapuh syiar bad siat khnam lane ka tim, u Bah Ferdinald ula ong “Ka jingiasiat khnam, iadur masi, iapuh syiar ki dei ki jingialehkai tynrai jong ka Jylla bad ngim pdiang da lei lei ruh ban ianujor ia kine ki jingialehkai bad ka Casino”.
Ha kajuh ka por, ka JAC kala pynpaw ia ka jingsngewsih halor ka jingkynnoh iaid lait jong ki bor Sorkar ia ka jingsngew jong ki nongshongshnong ka Them Ri-Bhoi haba pyntip “Kila ai ruh ia ki katto katne ki lisen bala tip kum ki Temporary Lisen sha kito kiba angnud ban buh ia kine ki ktem khalai”.
Ka JAC kala dawa ia ka Sorkar ba ka dei ban pynmih noh da ka jingpynbna ba kam don jingthmu shuh ban wanrah ia ka Casino hapoh ka District lem kumta ka Committee ka lah ban shim da ki lynti jingiakhih kynthup ki rally paidbah bad kiwei kiwei, ki ban pynlong hapoh ka District.
