Shillong, Nohprah 11 : Ka North East Petroleum Mazdoor Union hynne ka sngi Nyngkong kala byrngem biang ban pynsangeh ia ka jingpynpoi petrol/diesel sha Meghalaya naduh lashai ka sngi Ba-ar, ka 12 tarik Nohprah lada ki Pulit kim pyllait noh ia ki dkhot na along.
Ha ka shithi bala phah sha u Commissioner & Secretary ka Food Civil Supply & Consumer Affairs ka Sorkar Meghalaya, la ong ba ki dkhot ka Union ki dang don hapoh ka along watla ki nongiasaid ain kila pyrshang katba lah ban iasaid na ka bynta jong ki.
“Ki dkhot jong ngi ki dang don ha along ha Nongpoh bad ha kiwei ki jaka namar ki Pulit ka Meghalaya kila kem ia ki ha ka kyrteng ba ki khaii tuh ia ki umphniang ha ka 24 tarik Naiwieng, 2023. Hadien kane, ngi la kyrpad ia u Myntri ka F&CS ha ka 27/11/2023 bad la pynlong ruh ia ka High Level Meeting ha kaba la rai ba yn ym don shuh ka jingpyndik ia ki T/T ba lui lui. Ban bah jamin ia ki briew ba shah set along, ka union ka dei ban iaid kat kum ka lynti ka ain bad ban bud ia ki rule jong ki kompani umphniang” ong u Ramen Das, General Secretary ka NEPMU.
U Das ula ong ba ki dkhot ka Union ki dang iai bteng ban mad ia ki jingshah pyndik ha ki Pulit.
“Ki dkhot jong ngi kila nang bitar shuh shuh halor kane ka kam bad rai ba kin nym kit umphniang petrol/diesel shuh sha Meghalaya naduh ka 12 tarik Nohprah tad haduh ban da pyllait ia ki dkhot na along” bynrap u Das.
