Boko, Nohprah 12: Ka jingjia aksiden kaba sngewsih kala jia ha West Khasi Hills ha ka Lah Sngi u Blei, ha kaba u Head Teacher ula khlad noh ha katei ka jingjia katba u Assistant Teacher ula mynsaw jur na ka jingshah thombor ha ki nonglute.
U Superintendent of Police (SP) ka West Khasi Hills u Bikram D Marak ula pynpaw iaka jingsngewkhia halor katei ka jingjia bad ula iathuh ba katei ka jingjia kala jia ha ka por ba kitei ki nonghikai kila mih na ka State Bank of India, Nongstoin Branch ban leit sha skul.
“Katei ka jingjia kala jia haka shnong Mynniar kaba hap hapoh jong ka Nongstoin Police Station. Ia kitei la tip kyrteng kum u Tengton R Sangma (50) na ka shnong Rangshpara, Meghalaya bad Surya Kumar Chetry na ka shnong Dakuapara, Boko, Assam. U Tengton R Sangma udei u Head Teacher jongka Rangshapara Secondary School bad u Surya Kumar Chetry udei u Assistant Teacher jong katei kajuh ka skul.” ong u Bikram D Marak.
U SP ula iathuh ba kitei kiarngut kila wan na Rangshpara Secondary School bad shong da ka thuk thuk kaba don ia u nombar AS 25E 1324 ban sei pisa na ka Bank kaba la ioh kum ka School Grant. Hadien ba kila dep shim ia katei ka pisa kila leit phai sha Nongstoin ban leit sha skul lyngba ka surok Lumpi- Nongstoin hynrei ki runar kila thombor noh ia ki bad kila knieh jubor ia katei ka pisa na ka kti jong ki.
“Ki nongshong shnong ha ka thaiñ kila phah wan mardor iaka kali kit nongpang bad la kit noh ia ki mardor sha Nongstoin Hospital ban ioh ia ka jingsumar, hynrei ki Doctor kila pynbna ba Tengton R Sangma ula khlad noh katba ia u Surya Kumar Chetry la phah kit noh sha Shillong ban ioh iaka jingsumar kaba paka” ong u SP.
U SP ula iathuh, ba ha kine ki 3 snem kiba la dep, kam shym la don satia kano kano ka jingleh ia ki kam sniew ha katei ka jaka bad ki pulit mynta kila pynlong iaka jingthwet bad ka jingtohkit halor katei ka jingjia bad kin sa kem ia kiba donktibad ban pynshitom ia ki katkum ki kyndon aiñ.
Ha kawei pat ka liang, katei ka jingjia kala sdang ban pynbitar ia ki shnong kiba don ha khappud hapdeng ka jylla Assam bad Meghalaya, hynrei kiba bun balang hi kiba na kitei ki ar tylli ki jylla kila pynpaw iaka jingsngewkhia kaba jur halor katei ka jingjia bad kila kyntu ia ka sorkar Meghalaya ba kadei ban pynshitom ia kiba donkti ha katei ka kam sniew.
