Bynniaw u MP ba sahteng ki skhim MPLADS lah palat 22 snem ha Jylla

Shillong, Naiwieng 4 : U MP ka Congress na Tura Saleng A Sangma ula pynpaw ia ka jingsngewkhia halor ka jingslem ban pyndep ia kiba bun ki skhim hapoh ka Members of Parliament Local Area Development Scheme (MPLADS) wat hadien bala iaid la palat 22 snem ha Jylla.

Hadien ba wan iashimbynta ha ka jingialang jong ka State Level Monitoring Committee (SLMC) hynne ka sngi Nyngkong, u Saleng ula ong “Ki don ki kam ba dang shateng naduh u snem 2002 haduh mynta. Nga kum pyrkhat balei ba wat hadien 20 snem ruh, ki dang don ki kam ba sahteng na ka MPLADS watla ka pisa ban pyntreikam ka dei kaba rit. Ngam tip kaei kaba bakla ha ka rukom treikam. 22 snem kam dei ka kam kai”.

Kat kum ka jingong jong u, katto katne na ki kam ba sahteng ki dei kiba la mang hapdeng T.50,000 haduh T.10,00,000.

“Ngi la iashong bishar kam halor ki kam ba dang sahteng bad u Chief Secretary ula bthah ia baroh ki Deputy Commissioner ban pynthikna ba baroh ki kam ba dang sah ki dei ban dep pyntrei noh hapoh u bnai Nohprah” ula bynrap.

Haba kylli ia ki daw ka jingslem ban pyndep ia ki project, une u MP ula ong ba lehse ki MP kiba rim kila aikam sha ki briew ki bym dei, ki bym shym la lah ban pyntrei ia ki project.

U Saleng ula pyntip ba ki don haduh 37 tylli ki skhim kiba la pyntrei hapoh ka MPLADS 2023-24 bad na kine, 28 tylli ki dei kiba la dep pyntrei bad 9 tylli kiba dang iaid.

Ha Shillong Parliamentary Constituency- ki skhim MPLADS bala dep pyntrei bad kiba dang sahteng ki long kumne – East Khasi Hills-515 tylli kila dep bad 29 tylli ki dang iaid, ha Eastern West Khasi Hills-6 tylli kila dep bad 10 tylli ki dang iaid, ha East Jaintia Hills-36 tylli kila dep bad 22 tylli ki dang iaid, ha South West Khasi Hills-113 tylli kila dep bad 15 tylli ki dang iaid, ha West Khasi Hills-baroh 7 tylli ki skhim ki dang iaid, bad ha Ri-Bhoi-22 tylli kila dep bad 17 tylli ki dang iaid.

Ha Tura Prliamentary constituency pat- ha NGH-30 na ka 54 tylli ki skhim kila dep pyntrei bad 24 tylli ki dang iaid, ha West Garo Hills-404 tylli ki skhim kila dep bad 29 tylli ki dang iaid, ha South West Garo Hills-37 tylli kila dep bad 87 tylli ki dang iaid, ha South Garo Hills-9 tylli kila dep bad 2 tylli ki dang iaid, ha East Garo Hills-25 tylli ki la deo bad kawei ka dang iaid.