Shillong, K’Lyngkot 24: Ki Kynhun sengbhalang jong ka rilum Garo Hills, ha ryngkat ki seng trei monsngewbha bad ki riew rangbah, kila pynlong ia ka jingialang ha ka sngi Saitjain ha SMELC Building ha Tura ban iakren halor ki jingjia kiba jia ha ka thain Rajabala.
Ha kane ka jingialang la wan shim bynta bun ngut ki nongmihkhmat na kylleng ka thain bad ka thong jong ka jingiakynduh lang ka dei ban pynleit jingmut ha ki jingjia kiba la jia ha Rajabala bad ki jingtohkit kiba dang iaid.
Ki nongmihkhmat kiba la wan shim bynta haka jingialang ki la pynpaw ia ka jingsngewkhia kaba jur daka ba kynnoh ba noh shilliang ka ain ka bym shym la lah ban pynthikna ia ka jingshngain bad ka jingktah jong ki jingnongwan shong shnong beain bad ka jingshah shim kabu ia ki jaka jong ki trai ri trai muluk.
Ki la rai lang ban dawa ba ia ka jingtohkit dei ban pyndep haka por bala buh bad ban pynthikna ia ka jingkem bad jingpynngat ia baroh kiba donkti haki kyndon ain ba tyngeh.
Ha kane ka jingialang, ki sengbhalang ki la rai ban aiti iaki mat jingdawa sha ka Sorkar Jylla ba kynthup ban ai jingiarap kaba T.50 lak kum ka ex-gratia na ka Special CM Fund bad kumjuh ruh T.50 lak na ka GHADC na ka bynta ka longïing kaba la duh noh bad ka jingpynbiang ïa ka kam Sorkar Grade-4 na ka bynta uwei u bahaïing hasem jong uba la khlad noh.
Ki sengbhalang ki la rai ruh ban buddien bha ïa ka jingtohkit bad ban pynthikna ban ioh bishar hok bad ki la thmu ban pynlong ïa ki prokram pynsngewthuh paidbah kynthup ka jingthang mombati bad ban pynneh iaka shong suk shong shngain.
Ha kane ka jingialang la iakren ruh halor kiwei pat ki jingeh bapher bapher ha ka imlang sahlang bad kila iawer ia ka jingiatylli ha ka imlang sahlang.
