Shillong, Rymphang 08: U Secretary ka North Eastern Council (NEC) K Moses Chalai ha ka sngi Palei ula ong ba ka jing lah pynlut ki Jylla Shatei Lam Mihngi ia ki song pisa bala ai da ka Sorkar Pdeng kam pat long satia kaba ai jinghun.
Haba iakren bad ki nongthoh khubor, u Chalai ula ong “Hynrei mynta katno, ngi la iohi ba ki Jylla kila sdang ban kiew. Satang lada ki lah pyniaid sted, ngi ruh ngim lah satia ban pyniaid sted, kumta ka don ka jingiadei hangne hangtai hynrei nga kwah ban ong ba kala don pat ka jingpyrshang bad la iohi ruh ia ka jingnang biang ka kam”.
“Kum ka nuksa, ka DoNER ka ju ai ia ka song pisa ba palat ne duna ia ka T.3000 klur hynrei mynta u snem, da ka jingwan ka Prime Minister’s Development Initiative for North Eastern Region (PM-DevINE) skhim, kala kiew sha ka T. 6000 klur. Kaei kaba nga mut ban ong ka long ba ka Sorkar India kala sngewthuh ba ngi lah ban trei kham bha bad kumta baroh kynthup ka NEC kan hap trei kham bun” ula ong.
U Secretary ka NEC ula kyntait ban kynthoh halor ka jingtreikam jong ki Jylla NE bad ong “Ngam dei ban jer kyrteng hynrei baroh ki Jylla kim long lang kumjuh hynrei ki jingnang pynjanai kila don bad ka jingwan ka pisa mynta kam dei shuh lyngba ki State Treasury lane State Finance Department hynrei kala leit beit beit sha ki vendor. Mynta kan shong ha ki Tnad ba dei khmih bad ki vendor ba katno ki lah ban pyntrei kloi ia ki kam. Kam iahap ia nga ban jer kyrteng mano ba kham lah ban trei bha napdeng ki Jylla”.
Haba kren halor ka Meghalaya, u Chalai ula ong “Haba iakren hi, ha Meghalaya, baroh ki Tnad kim long kumjuh, don ki tnad kiba trei bha, don ki tnad kiba trei lyngngai bha. Kumta hapoh ka Jylla hi baroh ki Tnad kim long kumjuh. Nga sngew thuh ba ka rukom treikam bad rukom peitngor jong ka Sorkar Meghalaya kan hap khlain khnang ba kin lah ban treikam kham bha ha ki sngi ban dang wan”.
U Financial Adviser ka NEC Gaigongdin Panmei, ula ong ba ka jingeh ba hakhmat eh bala mad da ka thain Shatei Lam Mihngi ka dei ka bor ban lah pynlut ia ka song pisa. Kat kum ka jingong jong u, ka Sorkar India kan nang ai kham bun ia ka song pisa satang lada ki Jylla ki treikam bha bad nang pynkhlain ia ka jingpynlut ia ka song pisa.
“Kumta, wat lada phi don ia ka pisa hynrei phim lah pat ban pynlut bad pynlut bha bad pynlut ha ka por kaba dei, kane ka dei ka jingeh ba khraw bha” ula ong.
Ha kawei ka liang, u Secretary ka NEC ula kubur ba ka jingioh jaka ka dei kawei na ki jingeh ba hakhmat duh haba pyntrei kam ia ki project kiba kongsan hapoh ka thain. U ong ba ki don ki project kum ki surok ha kaba ka Sorkar Jylla kam shym la lah ban pynbeit satia ia ka jingiadie iathied jaka.
 K Moses Chalai ha ka sngi Palei ula ong ba ka jing lah pynlut ki Jylla Shatei Lam Mihngi ia ki song pisa bala ai da ka Sorkar Pdeng kam pat long satia kaba ai jinghun.){kind=link}