Shillong, Lber 21 : Ki seng sain pyrthei ba don ha ka Liang Pyrshah hynne ka sngi ba-ar, kila pynpaw ia ka jingsngewkhia halor ka jingbym kren eiei u Lat halor ki sienjam bala shim da ka Sorkar ban leh eiei ia ki ishu ba kongsan ka Jylla kynthup ka jingwan rung kyrthep ki bar jylla sha Jylla.
“Ka jingkren lamphrang u Lat kam shym la kdew satia ia ki sienjam bala shim da ka Sorkar ban leh eiei halor ka jingrung ki bar jylla, ka jingshngain bad jingiada ia ki paidbah ba sah ha khappud” ong u MLA ka Congress na Umsning Dr Celestine Lyngdoh haba iashimbynta ha ka jingiatai ia ka jingkren u Lat.
Ula ong ba u Lat u khlem kren eiei ia kiba bun ki jingbym lah treikam jong ka Meghalaya Energy Corporation Limited (MeECL) bad ka jingbym lah pyntrei bha ia ka Jal Jeevan Mission ha ka Jylla nalor ka sienjam bala shim ban pynthikna ia ka jingtreikam haba shit haba shai haka synshar khadar.
U MLA ka VPP na Nongkrem Bah Ardent M Basaiawmoit ula ong ba u Lat ka Jylla u khlem kren eiei halor ka kam ban pynrung ia ka ktien Khasi ha ka khyrnit ba phra jong ka Riti Synshar ka Ri India.
Ula kynnoh ruh ba ha kine ki san snem bala leit, ki paidbah kila im ha ka jingtieng bad la pynbor ruh ia ki briew ba kin shim ia la ain hala ka jong ka kti haba ai nuksa ia ka jingjia ha kaba saw ngut ki runar kila shah bomiap ha ki paidbah ha Shangpung, West Jaintia Hills District.
Halor ka kam khappud, u Bah Ardent ula ong ba ka Sorkar kam dei ban ai ei ia ka jaka ba kordor sha ka Assam ha ka kyrteng jong ka jingiapynbeit pud.
“Nga khuslai naba ka jingleh kyrkieh ia kano kano ka kam ka lah ban lam sha ka jingbijai ei” ula ong haba kdew ia ka jingiakren khappud ba dang iaid mynta ban pynbeit ia ki hynriew tylli ki jaka iakajia ba dang sah.
Ula ong ba khlem pep, ka kajia khappud ka dei ia kaba hap ban pynbeit hynrei bun ki shnong ha ri-lum Khasi kila leit sha Assam namar ka MoU.
Haba iaroh ia ka jingtrei shitom jong ki Pulit ban iakhun ia ka thma pyrshah ia u droks ha Jylla, u Bah Ardent ula kdew ia ka jingdonkam ban leh tyngeh ia ki nongkhaii droks bad pynthikna ba kin shong slem bha ha along.
Ula kyrpad ruh ia ka Sorkar Jylla ban buh noh iala ka jong ka rehab centre haba buh ha ka jingmut jingpyrkhat ba ka jingsumar ia kiba la ngop ha u droks ka dei kaba rem dor bha bad ka dei ka jingeh ia kiba bun ki Kmie ki Kpa.
Une u Nongialam ka VPP ula ai jingmut ia ka Sorkar ban pyniadon bynta ia ki stad ki jhad jong ka Jylla ha ka State Education Commission.
Pule lang ia kane: Kular ka Sorkar ban bishar ia ka jingthungkam pura ia ki Nonghikai ha ki skul LP
