Shillong, Jymmang 24: Ka Khasi Students Union bad ka Jaintia Students Union kila pynapw iaka jingbynniaw ba ka National Testing Agency (NTA) namar haduh mynta kam shym la ai jubab eiei iaka shithi bala phah halor ka kynrum kynram ba mih na ka jingpynlong ia ka eksam NEET ha Meghalaya.
Katkum ka kyrwoh khubor kaba la phah da u General Secretary ka JSU u samla TR Suchen ula pynpaw ba halor ka jingiadei bad ka jingthurmur ka rukom pynlong eksam NEET ha Jowai bad ha Nongpoh, ym duna ia ka 500 ngut kiba thoh eksam ha kine ki ar tylli ki Center bad kane ka jingthurmur ka lah pynduh mynsiem shikatdei eh ia ki khynnah.
Ula ong, ba ka seng JSU bad KSU ryngkat bad ki khynnah pule kiba thoh iaka eksam NEET ki lah phah da ka shithi ujor sha ka NTA bad sha ka sorkar jylla, ban pan jingshai ha ka rukom pyniaid eksam ha kine ki ar tylli Center hynrei mynta ka la iaid kumba 2 taiew tam, hynrei ym pat ioh satia ia ka jubab na ka NTA, kaba la buh ia ki khynnah ha ka jingsah dum .
Ula pyntip ba ha ka jingialang kaba la pynlong ha ka sngi Palei ha Jowai kaba la iashimbynta da ki khynnah kiba thoh ia ka eksam NEET bad ki kmie ki kpa bad ki nongialam JSU bad KSU na West Jaintia Hills District Unit, kila pynrem jur iaka sorkar jylla namar ba kiwei ki jylla kum ha Telangana bad ha kiwei pat ki jylla, ki lah ioh iaka jubab na ka NTA halor ka jingthurmur ka rukom pynlong iaka eksam NEET kaba lah dep, hynrei ka sorkar jylla Meghalaya tat haduh mynta, kam pat ioh jubab na ka NTA.
Kane ka jingialang ka dawa da kaba tyngeh iaka sorkar jylla ba kadei ban iakren bad ki heh ka NTA na Delhi halor ka kaiphod kaba ka lah phah napoh ka jylla jong Meghalaya bad ka NTA ka dei ban jubab kloi namar ka Result NEET jong mynta u snem ka lah jan mih.
