Shillong Nailar 10: U President ka Hynniewtrep Youth Council (HYC) Bah Robertjune Kharjahrin ula pynpaw iaka jingbynniaw ba u Myntri Rangbahduh ka ri Narendra Modi, um shym la ai satia ia ka jubab kaba shai halor ka jingdawa pyntreikam noh ia ka Inner Line Permit (ILP) hapoh ka Jylla.
U Bah Kharjahrin ula ong ba ka seng ka ai khublei ia u Mynti Rangbah ka jylla bad ia ki Myntri Sorkar kiba la leit ban buddien ia ki mat kiba kongsan ba kynthup iaka ILP bad ban pynrung ia ka ktien Khasi ha ka Eight Schedule jong ka riti synshar ka ri bad halor ka jingiakren pynbeit ia u pud u sam bad ka jingpynkylla ia ki kyndon jong ka Sixth Schedule jong ka riti synshar ka ri.
“Ngi ai khublei ba ki la leh ia kaei kaba kila kular hynrei kaba kham sngewsih ka long ba u Myntri Rangbahduh ka ri ym shim la ai kano kano ka jubab kaba shai la yn ai bad lada ym ai ruh ym pynpaw balei ym ai, ka jubab kaba u ai kadei kato ka juh ka jubab kaba rim kaba la jubab mynta la baroh 4 ne 5 snem kata ba ngin eksamin. Ka jingkylli ka long kiei ki bynta kiba ka sorkar India ka dang eksamin sah lada dei ia ka ILP” ong u Bah Kharjahrin.
Ula ong, ba iaka ILP la pyntreikam ha ki 4 tylli ki jylla jong ka ri India bad kila don bun ki kynhun kiba la pyrshah iaka ILP ha ki iingkashari bad ha ka Supreme Court, hynrei ki iingkashari kila pynksan bad ka riti synshar ka ri ka shah bad ka long kaba bit ba biang ban pyntreikam.
U Nongialam ka HYC ula ong, ba ki nongjngohkai ki lah ban applai iaka ILP lyngba ka Electronic ILP ia kaba kim donkam ban leit shim phom ne ieng lain hynrei ki donkam tang ban shu pyndap ia ki jingtip ki jongki ha ki mobile ne computer bad ban phah ha kaban ioh iaka ILP bad ka jingdon ki kor ki bor kan pynsted ia ki kam ki jam baroh.
Ula iathuh ba ka seng kala dep ruh ban ai jingmut ban buh iaki Facilitation Centre kaba ki paidbah kin shim ia ka ILP la kadei ha ki kad liengsuin ne ha ki thain khappud.
Ha kaba iadei bad ki nongshong shnong ka Assam kiba iaid lyngba ka jylla Meghalaya, u Bah Roberjune ula ong, “Ka jingthmu jong ka ILP ka dei ban iada iaka jylla naka jingshah tam paid noh ha kiwei khnang ba kin ym ioh bor haka kam synshar khaddar, kin ym ioh bor ban thied iaka khyndew ne ban knieh ia ki kam ki jam jong ngi”.
Ula ong, ba ka seng kala kren shai ba kan ym ktah ia kita ki briew kiba shu iaid lyngba ka jylla dei ban ai noh ia ki da ka ‘Transit Pass’ bad haba kila dep ban iaid lyngba ki dei ban ai noh ia katei ka pass ne ban iathuh ba kila mih noh na ka jylla Meghalaya.
