Shillong, Jylliew 29 : U Nongialam ka NPP bad Myntri barim ka Sorkar James K Sangma, ula pynpaw ba um don jingthmu ban mih aireng ha ka elekshon shiteng samoi ka Gambegre constituency.
Ha ka kyrwoh ba pyllait hynne ka sngi saitjain, u James ula ong “Ban pynshai ban pynbeit shisyndon ia kane ka kam: Ngam don jingthmu satia ban iakhun ia ka elekshon shiteng samoi na Gambegre”.
“Ha ka jingialang jong ka party bad ki jingiakren, nga la pynshai ia ka nongrim jong nga ruh” ula bynrap.
Ula kynthoh ia kane halor ki khubor ba kynnoh ba ka don ka jingiapait iapra hapoh ka Party bad ka Iing ka sem jong u, halor ka jingai ticket na ka bynta ka elekshon ha Gambegre.
“Kaba sngew lehrain ban iohi ia ki lad pathai khubor, katto katne kiba la jan kot 80 snem bad ialam da ka Nongthoh khubor bala pawnam bha, kan pynmih ia ka jingthoh hakhmat duh bad ha ki social media khlem da pynthikna bad pynshai nangno ba ka ioh ia ka tyllong khubor” ula ong.
U James ula ong ba ym shym la don mano mano ruh ba phone ia u ban kylli ia kane ka kam bad ka long kaba kyndit ban iohi ia ka jingpynmih khubor ba ialam baklaha kane ka kot khubor tang na ki hamsaia.
