Shillong, Jymmang 12: I Kong Silbi Pasah iba la ioh ia ka khusnam Padma Shri na ka President ka ri ka Droupadi Murmu, ila pynpaw iaka jingthrang ba ki khun samla kin pyndonkam bad sngewtynnad ia la ka jong ki tiar tem tiar put tynrai bad ba kin burom ia la ka jong.
“Nga kwah ba ki khun samla ki jong ngi kin don ia ka sngewtynnad iala ka jong ka tiar put tiar tem, hooid, ka pyrthei kala nang iaid ryngkat bad ka jingstad, ki nang ban rwai Phareng bad Hindi bad ki nang bun jait ki jait tem bad jait put, ki sur hynrei ka por kala dei ia ngi ba kiwei kumno ki burom ia la ka jong” ong ikong Silbi.
“Ngi lei lei ngi bun ki tiar tem tiar put kiba kynsai, kaba kiwei kim lah ban ioh kum ma ngi lada ngi sei lut ia ki. Ki tiar tem tynrai kiba la buh da ki longshwa jong ngi ki long kiba shongdor haduh katta katta, ki sur kiba mih na ki, ki long ki sur kiba ktik ia ka jingsngew ia ki jylla bapher bapher jong ka ri India” ila bynrap.
Ine I Longkmie ila ong ruh “Ki jingkylla ki bun hynrei kum ki longkmie ngi dei ban tip kumno ban peit ba ki khun samla jong ngi kin ieid ia ka shad ka kmen lajong namar haba don la ka jong, ngi sngewsarong ban ong ia kiwei, ba ngi don ia la ka shad, ka tem ka put la ka jong bad ki khun shynrang ki jong ngi da lei lei kim dei ban klet ia la ka jong ka tynrai kaba u longshwa ula pynkham ha ngi” .
“Ngi dei ban hikai kumno ba kin nang ban shad, ban tem, ban ringsur da la ki jong ki tiar put tiar tem, khnang ba ma ngi ruh ngin pyni ba ngi riewspah haduh katta katta bad ngi ia ryngkat dor bad kiwei pat ki jylla jonga ka ri” ila ong.
Ila ong, ba ki sur kiba mih na ki jingtem ka ktik ia ka mynsiem jong kiwei pat ki jaidbynriew bad ki tip ba ki Khasi bad ki Pnar ki don iala ki jong ki sur kiba kordor kaba ki pynsawa bad kine ki jingpynsawa ki wanrah ia ka jingjop bad ka jingithuh ba ka jaidbynriew ka don iala ka sur put, sur tem, ki jingrwai, jingshad kiba kordor bad kiba riewspah.
I Kong Silbi ila pynpaw ia ka jingkmen ba ki don ki khun samla kiba ieid iala ka jong ka tiar put tiar tem tynrai bad ki smat ban hikai ia ki jingshad bapher bapher bad kumta im duh jingkyrmen ha kane ka juk ba mynta.
“Nga kyntu ia ki khun samla, ba lada phi leit shano shano ruh kynmaw keiñ ia la ka jong bad pyniwbih bad pynsuhsieng ia ka, kan sah junom la junom bad ngin pynneh pynsah keiñ ia la ka jong ka sur tynrai kiba sawa nangne na rilum jong ngi kiban ktik ia ka mynsiem jong kiwei” ong I Kong Silbi.
Ha kaba iadei bad ka jingioh ia ka khusnam Padma Shri, I Kong Silbi ila ong ba i dap da ka jingkmen bad khamtam ban ioh ia ka khusnam Padma Shri na ka kti jong ka President ka ri bad i ainguh ia u Kynrad uba la kyrkhu kyrdoh bad buh ia kane ka bynta ba in ioh pdiang ia kane ka khusnam.
Ila pynpaw ruh ka jingsngewnguh ia baroh kiba la pynbit pynbiang, ki nongpyniaid kiba da ibit ia I ban ioh ia katei ka khusnam bad ha kajuh ka por ila sngewnguh ruh iala ki khun, ki bahaiing bahasem, ki lok ki jor ki kiba kitbok kitrwiang ba in ioh ia ioh ia katei ka khusnam.
