Shillong, K’lyngkot 17 : Ka Cabinet Retreat ba 3 jong ka Sorkar Jylla kala kut noh ha ka sngi Saitjain da kaba pynleit jingmut ban plie ia ki lad kyntiew ia ka ioh ka kot ka Jylla lyngba ki buit treikam bad ki kabu hapoh ka Mission 10.
Haba ai jingkren, u Myntri Rangbah Conrad K Sangma ula batai ia ka lynti jong ka roi ka par, haba ban jur ia ka jingdonkam ban plie ia ki lad ki lynti ha ki bynta ba kongsan kum ka kam jngohkai, ka rep ka riang, ka jingkynshew kam shimet ban pyntyllun shakhmat ia ka jingkiew shaphrang ka Jylla.
Ula ban jur ia ka jingkut jingmut jong ka Sorkar ban kynjoh ia ka $10 billion economy ne ka ioh ka kot ba $10 billion hapoh u snem 2028, kaban kiew sha ka $16 billion hapoh u 2032 bad buh thongban kynjoh $100 billion hapoh u snem 2047.
U la pynpaw ba ka jingpynurlong ia kine ki thong ba angnud ka dawa kham bun ban ia ki thong ba thrang; ka donkam ia ka jingiatreilang, ka plan ba lah ban leh ha baroh ki Tnad.
Ka jingiakren ka pynleit jingmut eh halor ka jingpynkhlain ia ka rep ka riang ka Jylla lyngba ki policy kiba thmu ia kaei kaban jia shakhmat, ki jingpynkylla ia ka rukom treikam ha ki tnad, ka jingpyndonkam ia ki technology ban pynkhlain ia ki nongrep ba kin iai neh ha ka kam bad ka jingpynmih marrep.
Ka mat iakren ba kongsan eh ka dei ka jingthaw ia ka Meghalaya Agriculture Policy 2026, kaba thmu ban ai ïa ka lynti kaba bniah na ka bynta ka jingroi kaba neh ha ka rep ka riang ha ka Jylla. La iakren ruh halor ka jingkyntiew ïa ka agro tourism kum ka lad kaba dang mih ban pynïapher ïa ka ïoh ka kot ha ki nongkyndong katba dang pyni ïa ki rukom rep ba riewspah jong ka Meghalaya bad ka jinglong jong ki jaka.
U Myntri Rangbah u la ban jur ia ka jingpyndonkam ïa ki technology kiba thymmai ban tip lypa ïa ka jinglong ka suiñbneng bad ban pynduna ïa ki jingpang jong ki jingthung, ka ban pynkhlain ïa ka jinglah ban ïakhun ïa ka jingkylla ka suiñbneng ha ka rep ka riang. Ka tnad Animal Husbandry & Veterinary kan thaw ïa ka plan ba kyrkieh ryngkat bad ki 171 tylli ki kynhun response team ban buddien bha ïa ka koit ka khiah jong ki mrad. U Myntri Rangbah ula pynpaw ïa ka jinglah jong kane ka tnat ban kyntiew ïa ka jingpynmih ia ka doh ban bam ha jylla bad pynduna ïa ka jingshaniah ia ka jingshalan nabar.
Ki jingiakren halor ki kam ialehkai kiba la pynshong nongrim ha ka Sports Action Plan ba la sdang ha u snem 2025 ban pynroi ia ki nongialehkai, ryngkat bad ki 303 tylli ki projek kiba shongdor palat ₹2,000 klur kiba dang iaid shakhmat ban pynlong ia ka National Games 2027, kaba thmu ban thaw ia ka lynti ban kyntiew ia ka ioh ka kot ha ka jingialehkai kaba pynleit jingmut ha ki samla.
Hapoh ka PRIME Meghalaya, palat 500 ngut ki nongsengkam la ai ia ki jinghikai, kaba la ioh ia ka jingkiew kaba 25% ha ka jingmih hadien ba kila pyndep ia ki jinghikai. Ban pynkhlain shuh shuh ia ka rukom seng kam seng jam, ka prokram CM-ELEVATE ka buhthong ban ioh palat 3,800 ngut ki nongioh jingmyntoi da ka jingmang pisa kaba palat ₹130 klur. Ki plan ki kynthup ban pyndep ia ka Startup Policy bad ban sdang ia ka PRIME Venture Capital Fund ka ban kyrshan ia ki nongseng kam lyngba ki jingkynshew tyngka jong ki riew shimet.
Ka kam jngohkai, Arts, and Culture ka la buh ia ka lynti kaba khlain ban aikam aijam ia kumba 1.25 ha u snem 2028. La buh ia ka thong ban pynroi 3,000 tylli ki iingbasa hapoh u snem 2028 hapoh ka CM Meghalaya Homestay Mission 2025, kaba tyrwa subsidy ba 70%.
Ka jingïakren halor ka jingpynkylla ia ki jaka sor ka la wanrah ïa ka buit treikam kaba bniah ban pynwan dur thymmai ïa ka jinglong ki jaka hapoh ki jaka sor ka Jylla, da kaba buh hakhmat eh ïa ka jingweng ïa ka jingkhapngiah jong ka nongbah Shillong lyngba ka jingpynbeit thymmai ïa ki lynti iaid kali bad ka jingpynkynriah ïa ki nongdie madan ba la pynbeit ryntih, ka nuksa ban leh kumjuh ha sor Tura bad Jowai ban pynbeit ryntih ïa ki jaka sor.
Ha ka jingkren pynkut, u Myntri Rangbah ka jylla u la ban jur ba ka jingdon ia ka jingiohi jngai ne jingmut kam pat biang satia, namar ka donkam ia ka jingtreilang.
U la pynshlur ia ki ophisar ban don ia ka jingngeit bad ban bteng ban trei ia ki kam kiba lah ban leh.
