Shillong, Iaiong 15 : U Myntri ka Tnad Animal Husbandry & Veterinary Bah AL Hek, ula iathuh ba ka Sorkar Jylla kala buh ia ka thong ba hapdeng ka 5-10 snem, ka Jylla kan sa lah ban pynmih bad pyndap noh hi nalade ia ka jingdonkam dohsniang.
Haba kren sha ki nongthoh khubor, u Bah Hek ula ong ba ka Sorkar Jylla kala kyrshan ia ki nongri sniang hapoh ka Jylla lyngba ka Meghalaya Piggery Mission bad ka National Livestock Mission jong ka Sorkar Pdeng.
Ula ong ba ka Sorkar kala pyrshang katba don ki lynti ban pynthikna ba baroh ki skhim ki poi sha baroh ki nongioh bynta. “Bun ki briew kila ioh jingmyntoi na kine ki artylli ki skhim ri sniang” ula ong.
Ula bynrap ba sa kumba 500 ngut ki nongri sniang ha Jylla kila ioh jingmyntoi naba ka Sorkar kala pynjynsur ia ki kyndon ban aplai ia ka skhim, la ka dei na ka Meghalaya Piggery Mission lane ka National Livestock Mission ka Sorkar Pdeng.
U Myntri ula pyntip ba ki Ophisar ka Tnad Animal Husbandry & Veterinary hadien ba ki ioh pdiang ia ki aplikeshon, kila pynlong ia ka jingjurip ia kijaka ri sniang bad lada lah biang nadong hadong, ki nongioh bynta kila ioh ia ki jingmyntoi.
Ula bynrap ba ka jingpyntreikam ia ka skhim ka dei ka kam kaba iai bteng naba ka Sorkar kam lah ban ai sha baroh naduh ka sngi ba sdang pyntreikam ia ka skhim.
“Lada mynta u snem ngi ai 500 tylli ki sniang, lashem snem ngin ai kham bun bad kan iaid ruh kumjuh ha ki snem ban bud. Lad aka jingpyntreikam ia ka skhim ka iaid beit iaid ryntih bad ki briew ki pyntreikam bha, nga tharai ba hadien 5-10 snem, ka Jylla kan sa lah ban pynmih hi nalade ia ka dohsniang” ula ong.
Haba mynjur ba ka Jylla ka dang shadien ha ka jingpynmih dohsniang, u Myntri ula ong “Ka Jylla ka dang hap ban thied ia ki sniang na shabar ka Jylla ban lah pyndap ia ka jingdawa dohsniang ha ka Jylla”.
