Shillong, Naitung 11: Ka jingpynpra ia ki Chimney bad kiwei ki jingtei jong ki Karkhana Coke be-aiñ la buh thong ba dei ban pyndep hapoh ka 20 tarik u Naitung.
Haba pyntip ia kane, hynne ka sngi Baar, ka sorkar jylla lyngba ka kyrwoh khubor kala iathuh ba ka jingpynpra ia ki chimney bad kiwei ki jingtei jong ki karkhana Coke be-aiñ kala sdang naduh ka 8 tarik u Naitung.
“Lai tylli ki Chimney la dep ban pynpra haduh ka 10 tarik u Naitung bad ia kane ka kam la buh thong ba dei ban pyndep hapoh ka 20 tarik u Naitung” la ong bad ka bynrap ba katto katne ngut ki briew kiba donkti ha kaban pyniaid be-aiñ ia ki karkhana Coke la dep ban ithuh bad la dep kem ruh.
La iathuh ruh ba ka sorkar Meghalaya kala shim iaka rai rangbah ha kaba iadei bad ka jingmih jong ki karkhana Coke kiba be-aiñ ha ka jylla bad ban pynthikna ruh ban bud ryntih iaka hukum jingbthah jong ka Meghalaya High Court.
“La sdang ban leh da kaba tyngeh iaka jingseng be-aiñ ia ki karkhana Coke ha u Nohprah 2022 da kaba phah khang khyrdep ia kine ki karkhana bad kila sdang ruh ia ki kam ki jam ban pynpra ia ki Bee-Hive Coke Oven ban pynthikna ba kin ym lah shuh ban bteng iaka jingtreikam. Kane ka kam kala bteng haduh u ïaiong 2023 ha kaba la lah ban rat dyngkhong ia ki kam be-aiñ” la pynpaw ha ka kyrwoh.
La banjur ruh ba dei lyngba ka jingkular ka sorkar jylla bad pyntreikam iaka aiñ bad ban bud ryntih ia ki jingbthah jong ka High Court. La bthah ban pynpra noh ia kitei ki karkhana kiba la pyntreikam be-aiñ bad ban lap ia ki nongpyniaid iaka karkhana bad ban pynshitom ia kitei kiba donkti ha ki kam be-aiñ
La iathuh ba ka jingshim iaka sienjam kaba tyngeh bad ka jingshimkhia ka sorkar jylla ha kaban leh ia katei ka kam ban pynpra ia kitei ki jingtei kiba kyrshan iaka jingpyntreikam be-aiñ ia ki karkhana Coke bad ka long mar khongpong ia kano kano ka jingsngew da kaba shu sngap jar halor katei ka ishu.
“Ka sorkar jylla kala shimkhia mardor ia ka jingkular ka jongka ban iaid katkum ka aiñ bad ban pynneh pynsah iaka mei mariang kaba don haka jylla naka bynta ki nongshong shnong. Ka jingrat dyngkhong ia ki karkhana coke be-aiñ kadei ka sienjam kaba kongsan na ka bynta ban lah ban pynurlong iaka jingthmu ban iada bad ban pynneh pynsah iaka mei mariang bad ia ki jingim bapher” la pynpaw haka kyrwoh.
Ka sorkar jylla kala kyntu ia baroh ki nongshong shnong, ka imlang sahlang bad ia baroh kiba don bynta ba kin kyrshan bad ban ai ka jingiatreilang bad ki bor sorkar ha ka jingiaid shakhamt jong katei ka kam khynra.
Pule lang ia kane: Pynjari 144 CrPC ha Shillong : Ong ka DC ia ki paidbah ban rung iing noh hapoh ka 10 baje mynmiet
