Shillong, Jymmang 18: Hadien ba ki jingtei ia ka iing dorbar bathymmai ka jylla ki lah jan dep lut, mynta ka jingphaikhmat kala leit sha ka bynta ban pynbit pynbiang ia ki jingdonkam kiba hapoh bad shabar jong ka iingdorbar, haba buh ia ka thong ban ioh pynlong noh ia ka Dorbar Synrai ha kane ka iingdorbar ba thymmai.
“Kumba 85 – 87 percent jong ki jingtei kidei kiba lah dep tei. Ka jingpynbit pynbiang ia ki bynta ba shapoh kidei kiei kiei kiba bam por bha, hynrei ka jingtei ia ka building kadei kaba la dep. Ngi la lah mynta ban pyniaid shakhamt ia ki ka ban pynbit pynbiang ia ki bynta ba shapoh namar ba ngi lah lait na u slap” ong u Lamphang ka iing dorbar u Thomas A Sangma.
Haba ai jingbatai shuh shuh, ula ong, “Ki kam kiba iadei bad ki bynta kiba shapoh ki lah ban sdang noh. Ia baroh ki Tender, ki Work Order bad ka jingjied ia ki kynhun kiban pyntreikam ia ka kam kidei kiba la dep ban pynthikna. Shen ka jingshna ia ki bynta kiba shapoh yn sa sdang noh”.
Ula pynpaw ruh ba yn sa sdang noh ruh ia ki kam na ka bynta ban pynitynnad ia ki sawdong sawkun jong ka iing dorbar.
Haba kylli la ka don kano kano ka jingpynkiew iaka dor ha kaba iadei bad ka jingpyntrei ia ka kam, u Lamphang ula pynshai, “Kaei kaei ka jingkiew dor kaba la dep leh naduh kaba sdang, kadei kumta hi. Kam shym la don shuh kano kano ka jingpynkiew iaka dor, watla kala don la ka jong ka rukom bhah na ka bynta ban buh ia ki shuki ki miej. Ha kaba iadei bad ki jingtei, kam shym la don kano kano ka jingpynkiew iaka dor kaban palat ia kei kaba la dep ban pyntip kham hashwa”.
Ha kaba iadei bad ka jingbuh por ban pyndep ia ka jingtei, u Sangma ula ong, “To ngin ia kyrmen bad ngin ia duwai ba ngin pyndep ha shwa ban sdang ka Dorbar Synrai, hynrei kan shong ruh ha ki kam kiba iadei abd ki bynta ki jingpynbit pynbiang ha ki bynta ba shapoh jong ka iing dorbar namar kine ki kam kin kham shim por bad ngi dang hap ruh ban pyndep ia ka jingbuh ia ki shuki ki miej, ki jingdro bad ia ka sawdong sawkun”.
