Shillong, Nailar 28 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Balang, ula ong ba ka Sorkar Pdeng kala buh ia ka thong na ka bynta ka Jylla Meghalaya ba kan shna palat 1250 Km ka surok hapoh ka skhim Pradhan Mantri Gram Sadak Yojana (PMGSY) Phase-III.
Haba jubab hapoh Iingdorbar, u Bah Prestone ula iathuh ba hapoh ka Phase-I jong ka PMGSY-III, ka Ministry of Rural Development kala mang ia ka pisa ban shna ia kumba 400 km ka surok.
Hynrei, ka Sorkar ka dang ap ban pyllait ia ka pisa ban pyntreikam ia ka Phase-II jong ki project shna surok ia kaba ki Detailed Project Report (DPR) ba 600 Km ka surok la dep ban aiti.
“Nga ngeit skhemm ba ngin sa ioh ia ka jingmang pisa ia kane ha ki sngi ban wan” ula ong.
Ha kajuh ka por, u Bah Prestone ula pyntip ba ka Ministry kala dep pynjynsur ia ki kyndon ban pyntrei kami a ka PMGSY-III ha Meghalaya hadien ka jingkyrpad jong ka Sorkar Jylla ha ka por ba leit iakynduh ka kynhun na Jylla kaba ula ialam ha ryngkat u Myntri Rangbah Conrad K Sangma.
Namar kane, ki project kiba la buh hakhmat eh ha ka thup kila shah kynthup mynta hapoh ka PMGSY-III bad ka Sorkar Pdeng kala buh ia ka thong ba ka Jylla ka dei ban pyndep ia ka jingshna haduh 1250 Km ka surok hapoh une u snem mang tyngka 2024-25.
Shuwa kane, u Bah Prestone ula pyntip ba ka surok bala tyrwa na Photjaud-Tynnai sha Mawbidong kaba hap ha Mawkyrwat Block, la tyrwa mynta ban pyntrei noh hapoh ka PMGSY-III.
U MLA ka UDP na Mawkyrwat Bah Renikton Lyngdoh Tongkhar ula pyntip hapoh ka Iingdorbar ba ki paidbah ka thain, kila byrngem ban iakhih da kaba pynlong ia ka jingsangeh iatreilang bad ka Sorkar (Non-Cooperation Movement) lada kane ka surok (Photjaud-Tynnai sha Mawbidong) kami oh satia ia ka jingmang pisa.
U ong ba lada kane ka surok kam ioh ia ka jingmynjur na ka Ministry, la kyrpad ia ka Sorkar Jylla ban pyrkhat lang ha kaban mang pisa noh na ka State Plan.
Halor kane, u Bah Prestone ula ong ba ka jingartatien ba ka surok kan ym ioh ia ka jingmang pisa kan nym mih satia namar la dep pynrung ia ka hapoh ka thup ba kham kongsan bad mynta ka dang ap ban ioh ia ka jingmang pisa na ka Ministry.
 Bah Prestone Tynsong ha ka sngi Balang, ula ong ba ka Sorkar Pdeng kala buh ia ka thong na ka bynta ka Jylla Meghalaya ba kan shna palat 1250 Km ka surok hapoh ka skhim Pradhan Mantri Gram Sadak Yojana (PMGSY) Phase-III.){kind=link}