Shillong, Rymphang 07 : Ka Sorkar India kala bthah ia ka Sorkar Jylla ban bishar thymmai biang ia ka jingtyrwa ban pyn-im pat sa shisien ia ki artylli ki Wah ba jakhliah tam ka Jylla-ka Wah Umkhrah bad Umshyrpi.
“Ha ka jingshisha, ngi la buh ia ka jingtyrwa mynshuwa ban pynkhuid ia ka Wahumkhrah bad Umshyrpi. Hynrei, ka Sorkar India kam shym la mynjur ia ka jingmang pisa jong ka project ha katei ka por. La bthah ia ngi ban bishar thymmai biang, kaba ngi dang leh mynta” ong u Myntri Rangbah Conrad K Sangma hadien ka jingbuh mawnongrim ia ka Wah Umkhrah Riverfront Development Project ba T.39 klur hynne ka sngi Balang.
“Nga kyrmen skhem ba katba kane ka project ka dang iaid ngi ruh ngin nang pynkhreh ia ka project ka ban kynthup ia ka jingpynkhuid ia ka Wah Umkhreh bad Umshyrpi, kaba la donkam palat” ula ong.
Haba pynpaw ba ka jingpynitynnad bad jingsumar ia ki Wah ki don ar bynta, u Conrad ula ong ba ka Sorkar kala iatrei lang bha bad ka Ministry of Water Resources.
“Kam dei ba ngim iohi ia kaba heh, ngi sngewthuh b aka water front development bad ka um hi ruh ka donkam ia kaban ai jingiada bad pynneh ia ka jingkhuid bad kumta baroh kine ki artylli ki project kin iaid ryngkat ryngkat bad kin pynthikna ba ngin lah pynkhuid pat ia ki” ula ong.
Haba niew ia kane ka river front project kaba kongsan, u Conrad ula ong ba kala don ka jingkynshew ba jan kot ia ka T. 39 klur na ka bynta ka project bad bynrap ba ka Sorkar kan sa pyllait noh ia ki tender hapoh ka shi taiew lane shiphew sngi.
“Ka jingthmu hi ka long ban wanrah ia ka jingkylla dur bad jingpynitynnad ia ka Nongbah Shillong bad nalor kane, kan sa don ruh shibun ki kam kiba ngin sa leh ha kinne ki khyndiat bnai ban wan bad kane ka prokram hi kan dei kaba iai bteng” ula ong.
Haba pynpaw ba kane ka project kan ym don jingmut khlem ka wah, u Myntri Rangbah ula pan ia ka jingkyrshan, ka jingiatreilang bad ka jingiashimbynta lang jong ki shnong ki thaw.
Ha kajuh ka por, u Myntri Rangbah ula pynbna ia ka rai jong ka Sorkar ban buh noh shisngi ha manla ka lai bnai, ban pynlong ia ka jingpynkhuid Shnong ha ki shnong bapher bapher.
“Ngin sa pynlong ia ki jingpynkhuid shnong hala ki jong ki Shnong ha kaba ka Sorkar Meghalaya bad ka Tnad Urban Affairs kin bei pisa sha kine ki Shnong, lada donkam, kan air uh ia ka jingiarap song pisa ba kin pynlong ia kine ki jingpynkhuid shnong” ula ong haba bynrap “Ka khubor ka long ba ngi ialong lang kawei. Haba ngi pynkhuid kan long ruh ka jingpynsngewthuh bad jinghikai ia ki paidbah. Ngi kyrmen ba kane ka shisngi kan wanrah ia ka jingmih ki paidbah bad ka Sorkar ka kwah ban ialam lynti nakhmat halor kane hynrei ngi donkam ia ka jingkyrshan jong ki”.
U Myntri Rangbah ula bthah ia u Deputy Commissioner ban pynbeit ia ka tarik ha kaban pynlong ia ka jingpynkhuid shnong tang mar syn kut ka Dorbar Mang tyngka.
