Shillong, Nohprah 02: U Myntri ka Tnad Community & Rural Development Bah Hamletson Dohling hynne ka sngi palei, ula buh mawnongrim jong ka Integrated Block Complex, ka Ophis Building ba thymmai ka Amlarem C&RD Block ha ka jingiadonlang u MLA Bah Lahkmen Rymbui uba dei ruh u Myntri kam pohiing ka Jylla.
Haba kren ha ka jingialang, u Myntri ula ai ka jingiaroh ia ka jingtrei shitom bad ka jingshakri ba khlem thait jong ki Ophisar bad ki Nongtrei ka Amlarem Block bad ka jingpyntreikam thikna ia ki skhim bapher bapher ka Sorkar Jylla bad Sorkar Pdeng, kiba la ai jingmyntoi shikatdei eh ia ki paidbah ka thain.
U Myntri ula ong ba ka Sorkar Jylla kala mang T.2.77 klur ban teu ia ka Ophis ka ban sa sdang noh shen. Ula pynpaw ruh ba ka jingpynheh ia ka Ophis Building kan pynjanai shuh shuh iaka rukom treikam bad ka jingshakri sha ki paidbah jong ki shnong kiba sha kyndong.
Ula pyntip ba hapoh ka Amlarem C&RD Block, ki don haduh 71 tylli ki Village Organisation (VO) bad 590 tylli ki Self Help Group (SHG). Ki SHG kila noh synniang bad wanrah ka jingkylla ia ki nongnongshnong jong ka thain.
Kiwei kiwei kiba la kren ki kynthup ia u ma Lahkmen Rymbui Myntri kam Pohiing, u SC Sadhu Director ka Tnad C&RD, u Deputy Commissioner ka West Jaintia Hills Bah BS Sohliya bad kiwei kiwei.
