Tura, Risaw 18 : U Myntri ka Tnad ka Koit ka Khiah James PK Sangma ula buh mawnongrim ban kyntiew kyrdan noh ia ka Kherapara Primary Health Centre (CHC) sha ka Community Health Centre (CHC) ha Kherapara PHC, West Garo Hills.
Ia une u mawnongrim la buh ha ka jingiadonlang u MLA ka thain bad Chairman ka Board of Directors ka MTDC Ltd Saleng A Sangma, u MDC ka Babelapara bad Chairmam ka GHADC, Rakesh A Sangma bad kiwei kiwei. Lah ban kdew hangne ba ia kane ka jaka ban shna ia ka CHC la ai sngewbha da Nokma ka Kherapara.
Haba kren ha ka jingialang, u Myntri ula pynpaw ia ka jingsngewnguh ia u MLA ka thain Saleng A Sangma namar ka jingshimkhia bad ia u Myntri Rangbah ka Jylla uba la ai ka jingmynjur bad jingkyrshan ban pynurlong ia kane ka jingangnud kaba la slem jong ki paidbah ka thain.
Haba pynpaw ba kumba long mynta kane ka PHC ka don tang arngut ki Doktor, ula ong ba da ka jingpyndep ia ka jingkyntiew kyrdan sha ka CHC, kin sa nang don bun ki jingshakri kynthup ki doktor naduh ki surgeon, gynaecologist, anaesthesia, ophthalmologist bad kiwei kiwei nalor ki nos bad ki nongtrei.
U James ula wer ia ki paidbah ba kin shim ia ki lad aijingsumar bala pynbiang da ka Sorkar Jylla kum ka Chief Minister’s Safe Motherhood Scheme, ka Transit Home ia ki Kynthei ba armet bad kiwei kiwei ki skhim.
U Myntri ula ban jur ruh ia ka jingkongsan ka koit ka khiah jong ki briew haba ong ba ka koit ka khiah ka dei kaba kongsan tam bad baroh ki kam pynroi kiba wan ha ka thain kin long lehnohei lada ki briew kim lah ban pyndonkam ia ki namar ka jingbam ka jingpang jingshitom. Ula kyntu ia baroh ba ki dei ban shimkhia iala ka jong ka koit ka khiah.
Na ka liang u MLA ka Gambegre Saleng A Sangma ula ai khublei ia u Myntri Rangbah ka Jylla Conrad K Sangma bad Myntri ka Koit ka Khiah James PK Sangma halor ka jingmynjur ia ka jingtyrwa ba ula aiti ban kyntiew kyrdan ia kane ka jaka sumar ha Kherapara.
Ula ong ba watla ka PHC kala treikam ha Kherapara hynrei ka long kaba eh ban pynkynriah ia ki nongpang bala shitom jur shaduh sha Dalu bad Tura namar ka jingjngai ha kaba don ki khep ba ka jingjngai kala shim noh ruh wat ia ki mynsiem briew.
Ha kane ka sngi, u Nokma lem bad ki paidbah ka thain kila aiti ruh ia ka dorkhas sha u Myntri ka Koit ka Khiah ba pynsngew ia ki jingeh bad jingdonkam hapoh ka thain.
