Shillong, Naiwieng 16: U Myntri Rangbahduh ka ri u Narendra Modi ha ka sngi Saitjaiñ, lyngba ka jingpyndonkam ia ki kor digital, ula buh ia u mawnongrim ban tei ia ka Eklavya Model Residential School (EMRS) kaba thymmai ha ka shnong Baljek Aduma kaba hap ha Dadenggre C&RD Block jongka West Garo Hills.
Kane ka jingpynbna kadei kum shi bynta jong ka jingrakhe ia ka Janjatiya Gaurav Divas kaba la long ha Gujarat, ha kaba u Myntri Rangbahduh ka ri ula plie ia ki 42 EMRS School kiba ka jinglut jingsep kala kot sha ka T.1,900 Klur bad buh ia u mawnongrim ban tei sa 50 tylli kaban kot ia ka T.2,320 Klur. Ka jingtei ia ka EMRS ha Dadenggre kadei kawei napdeng kitei ki jaka pule kiba la ioh ia ka jingmynjur.
La pyni paidbah ia kane ka jingialang lyngba ki kor ki bor hapoh ka Multi Facility Centre, Dadenggre, ia kaba la wan ban iashimbynta da u Assistant Commissioner ka Dadenggre Civil Sub-Division u Bah Solomon J. Syiem, JRDO Derani K. Sangma, Block Chairman u Molen A. Sangma, u Nokma ka Baljek Aduma, Felorsing A. Sangma, District School Education Officer u Spencer W. Momin ryngkat bad ki ophisar na ka tnad pule puthi, ki Engineer, nonghikai bad ki khynnah pule.
Haba kren ha ka jingialang, u Assistant Commissioner u Bah SJ Syiem ula ong, ba ka jingtyrwa ban tei ia ka EMRS ka long da ka jingthmu ban ai ia ka jingnang jingstad kaban long ha ka kyrdan kaba halor ryngkat ka jingioh ia ka jaka ban sah ei ia ki khynnah riewlum bad kan don ruh ia ka jingdonkam kum ka smart classroom, ki Laboratory kiba la bit la biang, ki jaka ialehkai bad ka jaka ban pyntbit ia ka sap ka phong.
Ula ong, ba ka skul kan pynthikna ba ki khynnah na ki jaka kiba na nongkyndong kin ioh ia ka lad kaban ia ryngkat bad ki jaka pule kiba bha hapoh ka ri bad ula banjur ba ka EMRS kadei kaba la pynwandur ban pynneh pynsah ia ka kolshor ki riewlum ryngkat bad ka pynkup bor iaki khynnah pule da ka jingnang jingtip bad ban don ia ka jingskhem jingmut ban long kiba seisoh ha kane ka pyrthei kaba mynta.
Lah ban kdew, ba u Nokma Felorsing A. Sangma jongka Baljek Aduma ula noh synniang 70 bigha ka jaka na ka bynta ka projek ban tei ia ka skul EMRS.
 kaba thymmai ha ka shnong Baljek Aduma kaba hap ha Dadenggre C&RD Block jongka West Garo Hills.){kind=link}