Tura, Lber 19: Da ka jingthmu ban pynsuk ia ka leit ka wan bad kumjuh ban don ia ka jingshngain, ha ka sngi baar, u Chairman ka Meghalaya Infrastructure Development Corporation (MIDC) u James Pangsang K Sangma ula buh ia u mawnongrim ban tei ia ka jingkieng dewbilat ne RCC halor ka wah Ringgi ha Dadenggre.
Yn tei ia kane ka jingkieng RCC lyngba ka projek kaba T.9 klur jong ka sorkar pdeng kaba la maitphang da ka sorkar jylla hapoh ka jingialam u Myntri Rangbah u Conrad Sangma ha kaba yn sa iohi noh iaka jingmih bujli da ka jingkieng kaba paka ha ka jaka jong ka jingkieng kaba rim bad kaba la tlor, kaban pyniasoh ia ki paidbah kiba don ha baroh arliang jong katei ka wah, kaba long ruh kaba la donkam bha naduh ki por kiba la leit.
U James Pangsang K Sangma ula iaroh ia ka jingialam jongu Myntri Rangbah ka jylla uba la shimkhia ban pynurlong ia kane ka projek.
“Khlem ka jingshimkhia bad ka jingtuklar jong u Myntri Rangbah kane ka kam kan ym lah ban urlong, uba la kular ban wanrah ia ka roi ka par ha rilum Garo bad ula shimkhia bha ban wanrah ia kane ka projek kaba la long ruh kaba seisoh” ong u James.
Ka jaka naka bynta ban tei ia ka jingkieng kadei kaba la noh synniang ei da ka Dadenggre Catholic Parish, kaba long ruh ka sienjam kaba la ioh ia ka jingiaroh na baroh.
U James ula ong “Khlem ki surok bad ki jingkieng kiba biang, ka roi ka par kan ym lah ban urlong. Kane ka jingkieng kan ym dei satia tang ka jingtei, hynrei kan long ka lynti kaba kongsan ia ki paidbah ka Dadenggre bad ka Garo Hills. Kan plie ia ki lad kiba thymmai bad kan kyntiew ruh ia ka bha ka miat ha ka jingim jong ki pateng kiban wan”.
Ula kyntu ruh ia ki paidbah ba kin bteng ban ai jingkyrshan ia ki jingpyrshang jong ka sorkar, khamtam eh ha kaba iadei bad ka jingdonkam ia ka jaka na ka bynta ki kam pynroi.
U Grahambell Sangma u MDC bad EM ka GHADC kum u symbud kongsan ula iaroh ia ka rai jong ka sorkar ban pynthikna ba ka Dadenggre kan don ia ka jingkiew sted ha ka roi ka par bad ula iaroh ruh ia u Myntri Rangbah ka jylla u Conrad K. Sangma bad ia u Myntri Sorkar barim bad MLA barim ka Dadenggre u James Pangsang K. Sangma.
“Kane ka long ka jingsakhi kaba lah ban seisoh, haba ka sorkar bad ka imlang sahlang ka iatreilang. Kadei ka mawjam kaba kongsan ban jam shakhmat ha ka lynti jong ka jingkiew ha ka roi ka par” ula ong.
Ha kane ka jingialang la wan ban iashimbynta lang da ki nongialam shnong, ki riewpawkhmat ha ka imlang bad ki heh ophisar.
