Imphal, Lber 18: Ka jingiakynad hapdeng ar tylli ki Jaidbynriew riewlum kiba don hapoh ka jylla Mnipur mynta ka kynti kala khie thymmai biang hapdeng ka jingpakhang shnong ha ryngkat bad ka jingiakynad hapdeng jong ki.
Kane ka jingiakynad kala jia ha Churachandpur, jong ka jylla Manipur ha kaba la ïohi biang ïa ka jingïakynad ha ka miet jong ka sngi Ba-ar hadien ba la mih ki khubor shaphang ka jingïateh kular hapdeng kine ki ar tylli ki kynhun riewlum.
Katkum ki tyllong khubor na ki pulit, Ki jingïakynad ka la mih hapdeng ki jaidbynriew Hmar bad Zomi bad baroh ar ki kynhun riewlum , kaba la poi sha u pud jong ka jingia kawang maw bad ka jingpynjot ia ki iing ki sem.
Halor kane ka jingjia, la don ki khubor ki bym pat lah ban pynthikna ba ki don kiba mynsaw ha kane ka jingiakynad hapdeng kine ki ar tylli ki riew lum.
U District Magistrate haba ialeh ban wanrah biang ia ka shong suk shongsain ha kane ka thain u la pynmih ia ka jingtip ne ka jingpynbna paidbah, ha kaba u la kyntu ban wanrah ia ka jingsuk wat hapdeng jong ka jingiakynad.
Ki bor pyniaid District kila hap ban pynjari noh da ka pakhang shnong ne ka curfew hapoh u pud u sam jong ka Churachanpur District ha ka sngi Nyngkong hadien ba la mih ki jingïakynad hapdeng ki kynhun riewlum bapher bapher.
Ka jingïakynad ka la sdang hadien ba la mih ka jingkynnoh ba uwei u nongïalam riewlum u la shah thombor ha ki nongleh kam sniew ki bym lah ban ithuh dur khmat ha ka miet jong ka Sngi U Blei, hynrei ka jingïakynad ka la nang jur ha ka sngi Nyngkong namar ki nongshong shnong ki la dawa ban pynithuh ïa ki nongleh kam sniew kaba la lam pat sha ka jingia kynad hapdeng ki kynhun riewlum.
