Shillong, K’lyngkot 24: Ka Sorkar Jylla ha ka sngi Balang, kala buh mawnongrim jong ki lai tylli ki surok kiba lam sha ka New Shillong Township (NST) ba kynthup ia ka Bellafonte-NST (T. 49 crores), Diengpasoh sha Shillong Bypass (T. 55 crores), bad Bribah Mawpat-NST (T. 27-49 crores).
Ia kane ka prokram la pynlong ha Hotel Vivanta, Police Bazaar, Shillong ha ka jingiadonlang u Myntri Rangbah ka Jylla Conrad K Sangma bad u Symbud Myntri Rangbah ba khmih ia ka tnad PWD Bah Prestone Tynsong.
Kane ka jingbuh mawnongrim ka kynthup ruh ia ka jingpynbha bad pynheh ia ka surok Shillong-Diengpasoh sha ka 2-Lane, kaba long naduh 14Km sha ka 21.20 Km.
Ka jingkhot tender ia kine ki lai tylli ki surok la khmih lynti ba kan sa long ha kine ki khyndiat taiew bad ka jingpyntrei ia ki surok ruh kan sdang noh shen.
Haba ai jingkren, u Myntri Rangbah ula kubur ia ka jingeh halor ka jingkhapngiah, ka jingdheng kali bad ka jingnang roi jong ka Nongbah Shillong ha ki snem bala leit noh. Ula ong ba shibun ki kam la leh ha kine ki snem bala leit noh ban pynheh bad pyniar ia ka Nongbah khnang ban pynduna ia ka jingkhapngiah.
“Watla bun ki jingpyrshang kila don ha ki snem bala leit, kane kan dei ka sien ba nyngkong,khamtam ha kine ki arsnem ba ngi la iohi ia ka lynti kaba la iaplan bha ban lah pynurlong shisha ia ka jingphohsniew ha kaban pynduna ia ka jingkhapngiah ka Shillong” ong u Myntri Rangbah.
U Myntri Rangbah ula kren halor ka jingdonkam ban pynjanai ia ka sor Shillong bad ban nang pynmih ia ki jingtei jong ka Shillong Township bad Administrative City shabar jong ka Nongbah.
Halor ka Secretariat ba thymmai ha NST,ka Sorkar ka dang shong iaplan, pynwandur bad la khmih lynti ba kine ki kam kin dei hapoh u bnai Lber.U Myntri Rangbah un sa shong bishar ia ki jingpynwandur ha ka taiew ban wan bad la khmih lynti ba ka jingpyntrei ia ka kam kan sdang ha u Risaw. Ka Sorkar ka sngew ba ka jingpynkynriah kan iarap shibun ban pynduna ia ka jingdheng kali ha sor Shillong.
Ki don ruh shibun ki project ki ban sa plie mynta u snem ba kynthup ia ka Integrated Command and Control Center (ICCC), ka ban peit ngor ia ka sor Shillong baroh kawei lyngba ki palat 300 tylli ki camerasbala pyndait kum shibynta jong ka Smart City project.
Kawei pat ka project ka dei ha Golf Link bad ha ka jingiatreilang bad ka Golf Association, yn shna ia ki park, ki jaka lehkai Adventure Sports bad ka jaka ia ki paidba ba kin shong bad iaid kai.
“Ka Shillong kan iohi ia ki jingkylla dur ka bym pat ju iohi mynno mynno ruh” ong u Conrad.
U Symbud Myntri Rangbah Bah Prestone Tynsong ula ong ba ka Sorkar kan ai ka jingkyrshan sha ki Rangbah Shnong bad ban iarap ha ka jingplan ban pynwandur ia ki jaka sor kum ki jaka bala pynwandur bha kat kum ka juk (modern planned areas).
 ba kynthup ia ka Bellafonte-NST (T. 49 crores), Diengpasoh sha Shillong Bypass (T. 55 crores), bad Bribah Mawpat-NST (T. 27-49 crores).){kind=link}