Shillong, K’lyngkot 24 :Ka North Eastern Indira Gandhi Regional Institute of Health & Medical Sciences (NEIGRIHMS) sa shisien kala buh ialade ha ka jingshah peitkhmat halor ka jingkynnoh kheinsting shaba palat liam jong ki doktor kaba lam sha ka jingiap jong iwei i nongpang ba 23 snem ka rta hapoh ka Hospital hynnin ka 23 tarik Kyllalyngkot khlem ka jingtip ia ka daw.
Ki bahaiing hasem kila pynpaw ia ka jingbitar ia ka jingleh ki bor pyniaid ka Hospital, haba pyntip ba ki doktor kila leh Operation ia ine i nongpang khlem da ioh jingbit ne pyntip sha ki halor ka jingpang ba u don. Kat kum ka jingong ki bahaiing, ki bor pyniaid ka NEIGRIHMS kila leh ia ka operation da kaba aidaw ba don jingthut ha ki snier jong ine i nongpang.
Hadien kane, ia ine i nongpang la rah noh wut wut sha kamra ICU khlem ka jingtip jong ki bahaiing hasem. Kila kam ba kim shym la iakynduh satia ia ki doktor naduh ka 17 tarik Kyllalyngkot tad haduh ka 22 tarik Kyllalyngkot. Hynrei, ha ka 23 tarik Kyllalyngkot ha ka por 9 baje mynmiet, ki bor pyniaid ka Hospital kila pynbna ba ine i nongpang ula khlad noh.
Ki bahaiing kila kynnoh ia ki nongtrei jong ka hospital ba kim shym la pynsngap ia i nongpang watla une u samla ba 23 snem ula ud ba um lah ban ring mynsiem bha. Kila iathuh ba ine i nongpang ula thoh ruh ia ka shithi shuwa ba in khlad noh, ba batai ia ka jingkhein sting jong ki nongtrei ka Hospital bad ki bor khmih hapoh ka ICU.
Ki bahaiing kila kynnoh ba wat hadien kane ka jingpynbna ba ila khlad noh, ki bor ka hospital kila aiti tang ia ka death certificate khlem da pyntip pat ia ki daw jong ka jingiap.
Ki bahaiing hasem kiba la bitar lep ia kane ka jingjia, kila pyrshang ban leit iakynduh ia ki heh jong ka Hospital ban pan jingpynshai hynrei kila shah khang lynti pynban ha ki nongap pahara jong ka Hospital.
