Shillong, Lber 11: U Myntri Rangbah ka jylla u Conrad K Sangma hynne ka sngi nyngkong ula buh mawnongrim ban tei ia ki 3 tylli ki projek kiba kynthup ia ka New Shillong Water Supply Scheme, ka Land Reclamation Project ha ka Waste Processing and Disposal Site ha Marten Mawlai bad ka jingtei ia ka surok hapoh ka New Shillong Township ha Mawkhanu, Mawpdang.
Ha katei ka jingialang kaba la long ha Mawkhanu, Mawpdang la iadonlang u Symbud Myntri Rangbah ka jylla Bah Sniawbhalang Dhar, u Myntri ka tnad PHE u Marcuise Marak, ka Myntri ka koit ka khiah ka Dr. Ampareen Lyngdoh bad u Chief Secretary ka jylla u D.P Wahlang.
Haba kren ha ka jingialang, u Myntri Rangbah ula ong, ba ka New Shillong Water Supply Project, kaba kot T. 1600 Klur kadei kawei na kiba heh tam ka projek kaba ka sorkar kala bhah tyngka.
“Ka New Shillong Water Supply Scheme ka dei kawei na ki projek kaba heh ka ban pyntreikam ha ka histori jong ka jylla. La mang ia katei ka projek haduh T.1,600 Klur ha kaba la dep ruh ban pyllait T.500 Klur na ka bynta ka wat kaba nyngkong bad la buhthong ban pyndep ia ka project hapoh ka 36 bnai” ula ong.
Ka New Shillong Water Supply Scheme kan pynbiang um na ka bynta ka Nongbah Shillong bad New Shillong Township kynthup ia ki jaka pule, ophis treikam bad ki 32 tylli ki shnong kiba don kumba 29,889 ngut. Kane ka jingthmu ka dei ruh da kaba buh jingmut lypa ban pynbiang um ia ki 198,997 ngut ki briew ha u snem 2042 bad 413,701 ngut ki paidbah ha u snem 2057.
Ha ka jingshna ia ki surok shnong ha New Shillong Township, u Myntri Rangbah ula ong ba la shna ia ki surok ha Mawkhanu ha ka jinglut T.185 Klur.
Ula pyntip ruh ia ka jongshna ia kiwei kiwei ki surok hapoh ka New Shillong Township ban pynsuk ia ka leit ka wan, kiba kot T. 343 klur bad kine ki kynthup ia ka surok na Ummir sha Mawkhanu bad Kynoton sha Lyngkien, Bellefonte sha New Township, Diengpasoh Road sha Shillong Bypass bad na Bribah Mawpat sha New Township.
Ha ka wat ka Baar jong ki surok, ka surok ba 16.6 Km ba heh 15 Meter bad ka surok 2 lane ba 3.2 Km ba heh 7.5 M la tyrwa ha ka jinglut jingsep kaba T.185 Klur. Ia kitei ki surok la khmih lynti ban pyndep hapoh u snem 2026.
Ha kaba iadei bad ka Land Reclamation Project ha ka Waste Processing and Disposal Site ha Marten, Mawlai, u Myntri Rangbah ula ong, “Ki jaboh kiba la don ha katei ka jaka kam dei tang ka jingsngewkhia ki nongshong shnong ka thaiñ hynrei ka dei ia ki paidbah ha ka jylla baroh kawei. Ngin pynkylla ia kitei ki niut sha ki mar ia kaba yn lah ban pyndonkam biang”.
Ula ong, ba ia katei ka projek yn pyndep hapoh ka 12 haduh 18 bnai.
“Ia ka jaka lum niut yn sa pynkylla sha ka jaka kaba ki paidbah kin lah ban pyndonkam bad kane kan long ruh kum ka “Model” ne nuksa kaba lah ban leh ha kiwei pat ki jaka jong ka jylla” ula ong.
Ula ong ruh ba ka sorkar kala buh ia ka “Roadmap” ban kyntiew shuh shuh ia ka roi ka par jong ka jylla ban wanrah ia ka jingkylla ha ki paidbah.
“Ka sorkar MDA ka trei da ka jingiohi jngai kaba shai kdar bad ka Roadmap ban kyntiew shajrong ia ka jylla, hapoh jong ki 10, 25 bad wat 50 snem”, ula ban jur.
“Ha ki 4 snem ban wan, kan long ka por kaba kongsan na ka bynta ka jylla bad ki paidbah. Ka New Shillong Township kaba kynthup ia ka “Knowledge City and the Administrative City” la dep ban bhah pisa T.10 000 Klur lyngba ka Mang Tyngka na ka bynta ban kyntiew ia ka roi ka par, kaban plie lad ban aikam aijam ha ki kam kiba thymmai kaban kot 50,000 tylli” la ong u Myntri Rangbah.
Ula pyntip ruh ia ka jingbuh thong ka sorkar pdeng ban tei ia 8 tylli ki New Townships ha kylleng ka ri, u Myntri Rangbah ula ong ba ha ka New Shillong Township, Meghalaya ka don hapoh ka jingkhmih bniah jong ka Sorkar India ha kaba yn iohpdiang ia ka Additional Grant kaba T. 500 Klur.
Ula pyntip shuh shuh ba baroh kitei ki jingthmu jong ka sorkar kidei kiba iadei lang bad ki jingthmu bad ka jingiohi jngai jong ka jylla ban pynurlong ia ka thong jongka ioh ka kot kaba 10 Billion US Dollar bad ban kyntiew ia ka kamai kajih jong ki paidbah.
