Shillong Lber 28: U Myntri ka Sorkar Jylla u Bah Sanbor Shullai uba long ruh u MLA ka South Shillong Constituency hynne ka sngi Saitjain ula buh mawnongrim ban shna ia ki Ar tylli ki Cultural Centre ha ka jinglut jingsep kaba kot T.4 Klur tam.
U Bah Sanbor ula leit ban buh nyngkong eh ia u mawnongrim ban tei ia ka Cultural Centre ha ka shnong Kynjat Phutbol ha ka jinglut jingsep kaba kot T.2,05,15000 Klur.
Ha kane ka jingbuh mawnongrim la don ryngkat u Rangbah Shnong u Bah S Wahlang, ki nongialam shnong bad ki nongshong shnong.
Hadien kane ula leit pat ban buh ia u mawnongrim ban tei ia ka Cultural Centre jong ka Dorbar Shnong Madan Laban – Riat Laban kaba kot T.2,03,87000 ha kaba la iadonlang u Rangbah Shnong u Bah Ioster Sunn, u Secretary Shnong u Bah RG Marbaniang, ki nongialam shnong bad ki paid nongshong shnong.
Mar ia dep buh mawnongrim la pynsdang noh ia ka jingtrei bad la buh por ba ia kine ki artylli ki projek dei ban tei pyndep hapoh jong ka 2 snem khnang ba ka dorbar shnong bad ki nongshong shnong kin ioh ban pyndonkam ha ki bynta ki bapher bapher.
Haba kren ha ka jingialang, u Bah Sanbor Shullai ula ong, “Nga sngewkmen ba nga la lah ban pynioh ia ka bhah tyngka ban shna ia kine ki artylli ki projek bad nga dei u briew uba trei bun da ka kam bad duna ha kaban kren, kumba long kiwei pat ki nongialam kiba heh tang ka tyngam bad ban pynbeij da ki jingkren”.
Ula pynpaw ia ka jingkyrmen ba ynda la dep shna ia kine ki artylli ki projek kan long ka jingkyrkhu bad ka jingmyntoi ia baroh ki nongshong shnong khnang ba kin lah ban pyndonkam ha kiba bun ki liang bad ka Dorbar Shnong kan ioh ruh ban pyndonkam ha kaban pynlong ia ki prokram ki bapher bapher.
Ki nongialam shnong kila pynpaw ia ka jingsngewnguh ia u Bah Sanbor Shullai uba la pynurlong ia ka jingangnud jong ki paitbah khamtam ha kaban wanrah ia kine ki projek bad ban peit ia ka bha ka miat bad ban kyntiew ia ka roi ka par ha ka constituency baroh kawei.
