Shillong, Risaw 12 : U Myntri Rangbah ka Jylla Conrad K Sangma ha ka sngi Palei, ula buh maw nongrim ban tei ia ka Rongjeng Stadium ha East Garo Hills ha ka jingiadonlang u Myntri kam ialehkai Bah Shakliar Warjri bad ki MLA Jim Sangma bad Rupert Momin.
Ia kane ka Stadium la mang ban tei ha ka jinglut ba kot T. 9.25 klur, kaba kynthup ia ka madan ialehkai phutbol bad ka jaka shong ki nongpeitkai.
We will create 25 artificial turf football stadium across different parts of the State including indoor stadiums for promoting other disciplines like badminton, table tennis, etc. We also plan to continue the Meghalaya Games this year and will host this year’s games in Tura.
Our… pic.twitter.com/f16SnCJaQw
— Conrad K Sangma (@SangmaConrad) October 12, 2023
Haba kren ha ka jingialang, u Myntri Rangbah ula pynkynmaw ia ka jingialang halor ka jingiohi jngai jong u (L) PA Sangma, uba don ia ka jingieid ba kyrpang ia ka Rongjeng bad ki paidbah.
U Myntri Rangbah ula ong ba ka jingpynkha ia ka Rongjeng Sub Division bad kiwei ki jingtei kiba la mih mynta ha ka thain, ki dei ka sakhi ia ka jingiohi jngai jong u (L) PA Sangma na ka bynta ka Rongjeng.
Haba kren halor ka jingkyntiew ia ki madan ialehkai, ula ong ba ha kine ki san snem bala leit kata naduh u snem 2018, ka Sorkar kala pynlut haduh T. 400 klur tam haba ia nujor bad ki 45 snem bala leit noh.
Ula pynbna ba ha kine ki san snem ban wan, jan kot T.1000 klur yn sa pynlut ha kaban tei ia ki madan ialehkai ha kylleng ki jaka jong ka Jylla.
“Naduh ba ioh Jylla lajong haduh u 2018, duna eh la pynlut ha kaban kyntiew ia ki kam ialehkai hynrei ka Sorkar MDA kala iohi ia ka kabu jong ki kam ialehkai bad ngi lah wanrah ia ki prokram ban kyntiew ia ki kam ialehkai hapoh ka Jylla” ula ong.
Ula pyntip ruh ba ka Sorkar kala buhthong ban kyntiew kyrdan haduh 25 tylli ki madan ialehkai phutbol hapoh ka Jylla da ki artificial turf.
Ula ong ba ka Sorkar kala phaikhmat ban kyntiew ia ki jingialehkai bapher bapher khnang ba ki samla kin ioh jingmyntoi shikatdei eh na ki prokram bapher bapher.
Ula pyntip ruh ba ka Meghalaya Games 2023 kan long ha Tura mynta u snem, ka ban wan iashimbynta da palat 3000 ngut ki nongialehkai na kylleng ki jaka jong ka Jylla.
“Ka jingpynleit jingmut jong ngi ka long ban wanrah ia ki madan kiba paka khnang ba ki samla jong ngi kin ioh ia ka rynsan ban pyni pyrthei iala ka sap ka phong” ula pynpaw.
U CM ula shim kabu ruh ban pynsngewthuh ia ki paidbah halor ka CM Elevate Programme kaba thmu ban kyrshan ia ki nongsengkam ha ki kam bapher bapher.
Ula kyntu ia ki paidbah ba kin shim kabu ia ka CM Elevate Programme.
Haba ai jingkren, u Myntri kam ialehkai Bah Shakliar Warjri ula ong ba ka Sorkar kala kut jingmut shisha ban kyntiew ia ki kam ialehkai hapoh Meghalaya.
“Hapoh ka jingialam u Myntri Rangbah Conrad K Sangma, ngi lah trei shaid shaid ban pyni ia ki madan ialehkai kiba paka hapoh ka Jylla. Ngi kwah ban pynlong ia ka Meghalaya kum ka Sports Capital”.
Ha kane ka sngi, kala don ruh ka jingialehkai phainal jong ka MLA Cup hapdeng ka United Shallang FC bad ka Balbarian Sports Club, Rongjeng.
