Weng shuwa ia baroh ki case bad iasoi soskular sangeh iasiat
Shillong, Naiwieng 17 : Ki Nongialam ba hakhlieh ka Hynniewtrep National Liberation Council (HNLC) ha ka sngi Thohdieng kila pynpaw ba kim lah satia ban wan iashimbynta ha ka jingiakren iasuk tad haduh ba ka Sorkar kala weng noh ia baroh ki case ba sah pyrshah ia ki bad ruh ban iasoi ia ka soskular sangeh iasiat.
Ha ka kyrwoh, u Chairman ka HNLC Bah Bobby Marwein bad General Secretary-cum-Publicity Secretary Bah Sainkupar Nongtraw ula ong “Ia mynta, ka jingiakren ba sdang jong ka jingiakren iasuk kala sdang hapoh ka jingbtin lynti u Vice Chairman barim jong ngi. Hynrei, ka Sorkar kala pynbor halor ka jingwan iashimbynta u Chairman bad u General Secretary”.
“Ngi la dei kren shai ba tad haduh bala weng noh ia baroh ki case pyrsha ia ngi lane la iasoi ia ka soskular sangeh iasiat, u Chairman ka HNLC lane General Secretary kin ym lah ban iashimbynta ha ki jingiakren” kila ong bad bynrap “ Ka Seng kala pynkhamti ha u Vice Chairman ba thymmai Teimiki Laloo, ba un peit ia ka kam iakren iasuk bad ban bishar ruh ia ka jingiaid jong ka kam”.
U Bah Bobby bad Bah Sainkupar ula ong ba ka HNLC ka kwah ban don ka political dialogue bad ka Sorkar India kum ka jingpyrshang ban wanrah ia ka jingsuk ba neh shirta.
“Ngi ngeit skhem ba donkam ia ka jingpynbeit da ka bor sain pyrthei ban ioh ia ka jingsuk ban eh. Namar kata, ka long kaba kongsan ba ka jingiakren iasuk kam dei ban shah teh da ki kyndon. Lada dei ban buh da ki kyndon, ki dei ban long kiba la mynjur da baroh arliang mamla ha ka jaka ban shu leh donbor da kawei ka liang marwei” kila ong.
Haba pynpaw ba ka jingiakren iasuk ka dei kaba la pynlong ban lah wanrah ia ka lynti iapynbeit lyngba ki jingiakren, ki Nongialam ka HNLC ula ong “Hynrei, ka Sorkar India ka khmih ban pynman ia kine ki jingiakren kum ha ka dur jong ka jingpyndem ne pynkut ia ka jingkiengatiar”.
“Ngi kwah ia ka jingsuk ba neh shirta kaba don ia ka jinglaitluid bad ka jingbishar ba hok haba ithuh bad burom ia ka jingsngewkhia bad ki jingangnud jong ki paid Hynniewtrep kum ka Jaidbynriew. Ngi pyrshah jur ia kano kano ka jingngeit ha ka jingsuk ba shipor kaba lah ban ktah ia ka jingdon kum ka Jaidbynriew bad ka hok ban pyniaid hi iala ka jong ka jingim” kila ong.
