Shillong, Naitung 02 : U Symbud Myntri Rangbah ka tnad Pohiing (Police) Bah Prestone Tynsong ula pynpaw ba ka jinglong jingman ha khappud ka Assam-Meghalaya kala kham jai jai bad ki jingpyrshang kiba kyrpang kila iaid shaid shaid ban wanrah pat ia ka jinglong ba jai jai ha Lapangap.
Haba iakren bad ki nongthoh khubor ha ka sngi Balang, u Bah Prestone ula ong ba ka Sorkar kala buh ia ka ktem Pulit ba shipor ha Lapangap bad buh haduh 30 ngut ki Pulit kiba treikam baroh 24 kynta ban tehlakam ia ka shongsuk shongsain.
U Bah Prestone u iathuh ba ka Sorkar Assam ruh kala buh mar katjuh ki Pulit sha shiliang u pud u sam jong ka.
Ula pynpaw ia ka jingsngewskhem ba ka jinglong jingman kala kham jai jai bad iathuh ba u Myntri Rangbah ka Jylla un sa iakren ia kane ka kam bad u Myntri Rangbah ka Assam ha kaban pynbeit noh ia ki kam kiba dang sahteng.
“Khlem pep, u Myntri Rangbah un sa iakren ia kane ka kam bad u Myntri Rangbah ka Assam. Ym tang katta, ka jingiakren lyngba ka phone ruh kala don (hapdeng jong ki halor kane ka kam” ong u DyCM.
Haba kylli halor ka plan ban buh ia ka ktem pulit ba shirta, u Bah Prestone ula ong ba ka lad ban pynkylla ia ka ktem ba shipor sha ka ktem ba shirta kan dei ka kam ka ban sa shong bishar hadien ba ki jinglong jingman kila jai jai lut.
Ia mynta, ka ktem ba shipor ka dei kaba la buh ban peit ia ka jingshngain hapoh ka thain” ula bynrap.
 Bah Prestone Tynsong ula pynpaw ba ka jinglong jingman ha khappud ka Assam-Meghalaya kala kham jai jai bad ki jingpyrshang kiba kyrpang kila iaid shaid shaid ban wanrah pat ia ka jinglong ba jai jai ha Lapangap.){kind=link}