Shillong, Naiwieng 13 : Ka Sorkar Jylla kala pynskhem ia ka dor kit ba kumjuh (uniform) kaba long T. 9 shi ton ha ka shi kilometer ia ki kali kiba kit dewbilat bad clinker hapoh u pud u sam ka Jylla Meghalaya.
Ia kane ka rai la shim ha ka jingialang bala pynlong hynne ka sngi Palei, da ki arngut ki Symbud Myntri Rangbah-Bah Prestone Tynsong bad Bah Sniawbhalang Dhar, kaba la wan iashimbynta da ki nongmihkhmat ka Jaintia Hills Cement Manufacturers Association bad ki laitylli ki seng trok (Jaintia Hills Truck Owners & Drivers Association, East Jaintia Hills Truck Owners & Transporter Association, bad Meghalaya Commercial Truck Owners & Drivers Association).
Kine ki Seng kila ai jingmynjur ia kane ka dor bala buh da ka Sorkar Jylla.
Ia kane ka jingialang la pynlong hadien ka jingiakhih kaba la pynmih ia ka jingkulmar, bala pynlong da ka MCTODA ha lad Mawryngkneng.
Haba kren sha ki nongthoh khubor hadien ka jingialang, u Symbud Myntri Rangbah Bah Sniawbhalang Dhar ula ong ba ka jingialang ka long kaba sngewtynnad bha bad bun ki mat la iakren bad don ruh kiba la buh ban iakren shuh shuh ha ka taiew ban wan.
Ka dor kit ba thymmai ba T.9 la bujli noh na ka dor ba la buh hashuwa kaba long haduh T.7-T.11 shi ton ha ka shi kilometer, ka sienjam kaba la pdiang da ki seng trok, ula ong.
Kat kum ka jingong jong u, ka dor ba T. 9 ka treikam tang ia ka jingkit hapoh u pud u sam ka Jylla. Ka jingkit palat pud bad ka dor ba shabar ka Meghalaya kam shym la dei ka mat iakren ha kane ka jingialang.
U Bah Sniawbha ula pyntip ba ka Sorkar kala ban jur ruh ban buh ia ka bhah ba 120 tylli ki trok ia ki kali na Jylla ha kaba 80 tylli ki trok kila dep don lypa.
“Ki (seng cement) la mynjur ia 100 hynrei ngi la pynbor sa 20” ula ong haba bynrap “La aipor shitaiew ia ki karkhana pynmih dewbilat ba kin shim rai khatduh ia ka jingbuh bhah”.
U pyntip ba ka jingialang buddien ia kane ka kam kan long biang ha ka 21 tarik Naiwieng, ban pynkut syndon ia kane ka kam.
Ha kawei ka liang, u President ka MCTODA Bah M Marngar ula ong ba ka seng jong u kala pynpaw ba kumno ki karkhaan dewbilat kila khnoit ia ka dor kit da kaba tyrwa ia ka dor ba iapher kaba long hapdeng T.7 – T.11 ha ka shiton na ka bynta ka shi kilometer ban kit dewbilat bad clinker.
“Hadien ka jingiakren kaba slem bha, ban kiar ia baroh ki jingiakynad lada phim kwah ban ai ia ngi ia ka dor ba T.11 ha ka shiton, phi dei ban ai ia ka dor kaba la buh pura, wat ai ia ka dor ba iapher kaba long T. 7 haduh T.11, kaba ai ka lad ia ki ban khnoit ia ki trai bad ki nongniah trok” batai u Bah Marngar.
Ula pdiang ia ka jingmih na ka jingalang bala pynlong da ki Symbud Myntri Rangbah bad pynpaw ba kine ki arngut ki nongialam, kila rai ban buh ia ka dor kit ba T.9 ha ka shiton na ka bynta ka shi kilometer hapoh ka Jylla.
U Bah Marngar ula kdew ia ka jingiapher ha ka rukom aikit mar ia ki trok bad ong “Ki trok ba pyndonkam da ki karkhana dewbilat na shabar ka Jylla ki don haduh 1000-2000 shisngi, katba tang 80 tylli ki trok (kiba dei jong ka Jaintia Hills Truckers Association bad East Jaintia Hills Truck Owners Association) na Jylla ki ioh ban kit mar man ka sngi”.
Ula pynpaw ia ka jingbym sngewhun ia kane ka rukom pynbeit bad dawa ba ki trok na Jylla ki dei ban ioh nyng kong eh namar ia ki karkhana la seng ha jylla Meghalaya.
 kaba long T. 9 shi ton ha ka shi kilometer ia ki kali kiba kit dewbilat bad clinker hapoh u pud u sam ka Jylla Meghalaya.){kind=link}