Shillong, K’lyngkot 30: Ka Sorkar Jylla kala pynmih ia ka jingpynbna ba baroh ki skul hapoh ka Jylla, ki dei ban pynsdang ne plie noh ia ki skul ha ka 15 tarik Rymphang ban pynthikna ia ka jingiaid beit ka jingshim klas jong une u snem 2024.
Ha ka jingpynbna bala pynmih da ka Tnad Pule Puthi ha ka sngi Nyngkong, la ong ba baroh ki skul ki dei ban pyntreikam ia kane ka calendar long skul bad ban bud ia ki jingbthah bala pynmih da ka Tnad. Kano kano ka jingpynkhein kan khring sha ki jingpynshitom kat kum ki Ain bad ki Rules.
Kane ka calendar skul ka ong ba ka jingplie skul bad shim klas kan sdang naduh ka 15 tarik Rymphang bad ka sngi ba khatduh ban pynlong ia ki skul Pre Primary ka dei ban long ha ka 29 tarik Naiwieng, katba ia ki klas 1-10, ka dei ban kut hapoh ka 20 tarik Nohprah. Ka shuti tlang ka dei ban sdang naduh ka 21 tarik Nohprah haduh ka 9 tarik Rymphang jong u snem ba bud.
Ka jingpynbna ka ong ruh ba nalor ka shuti tlang, ki skul ki dei ban ai shuti tang ia ki sngi shuti bala pynbna da ka Sorkar Jylla. Ym dei ban pynbna shuti ha kino kino ki sngi da ki bor pyniaid skul khlem da ioh jingbit na ka Sorkar, ong ka jingpynbna.
Haba kren halor ka por long skul, ka Tnad Pule Puthi ka pynbna ba baroh ki skul ki dei ban bud ia ka por long skul bad ban plan ha katei ka rukom ba pynbeit ia ka kynta long skul kat kum ki kyndon jong ka RTE Act. Ki skul kiba don ha Shillong bad Tura, kiba hap hapoh ki jingbthah jongki bor pyniaid District halor ka por longskul, ki dei ban pyntip ia kane kajuh sha u Director of School Education and Literacy.
Ka Tnad ka bthah ruh ia baroh ki skul ba ki dei ban don ka Assembly session ne jingpynieng lain ia ki khynnah ha ka por mynstep shuwa ban long skul, ia kaba dei ban pyniaid hi da ki Khynnah skul, ka ban long ruh ka lad ia ki ban tbit ha ka lain ai jingkren. Ki khynnah ba pyniaid ia ka assembly ki lah ban kren halor ki jingjia ba man ka sngi (current affairs), value education, motivational bad kiwei kiwei.
Haba bthahba dei ban pyndep 100 na ka 100 ka syllabud hapoh ka por ba buh, ka Tnad ka bthah ba baroh ki Nonghikai ki dei ban pynkhreh iala ki jong ki jong ki lesson plan.
Nalor kane, ka Tnad kala bthah ia ki skul ban pynthikna ba ki khynnah klas 6 haduh 12 kin ioh ia 10 sngi ha ka shisnem ban nym kit pla sha skul bad ba kin ioh ia ka lad ban leh ia ki co-curricular activites kum ka kam shet kam tiew, kam rep syntiew, career counselling, ki project kam jngohkai, life skills, music, arts and culture, bad ki kam ialehkai.
Shuh shuh, ka jingpynbna ka bthah ruh ia ki skul ban shim ia ki sienjam ha kaban pynthikna ba kin pynlong ia ki assessment (test) ia ki khynnah kumba la bthah da ka National Education Policy (NEP), 2020. Khnang ban pynthikna ia kane, ki skul ki lah ban plan ia ka jingpynlong ia ki assessment lane unit test n aka por sha ka por. La ai jingbit ba ki lah ban pynlong ia ka assessment ba shisien shibnai ne shisien lai man kat kum ka jingpynbna.
