Shillong, Risaw 01 : Ka Tnad Meghalaya Police kala pynbeit bniah bha ia ka kam pahara bad ka jingpyniaid kali na ka bynta ka jingwan u Myntri kam Pohiing ka Ri Amit Shah sha Shillong ha ka 4-5 tarik Risaw na ka bynta ka jingpynkup burom Presidential Colours.
“La pynkhreh bniah bha na ka bynta ka jingwan u Myntri kam Pohiing ka Ri, kaban long ha ka 4 bad 5 tarik Tisaw, bad u SP Traffic un sa pynmih ia ki jingbthah halor ki surok ba kin iaid kali bad ban kiar, ka por, khnang ba kan pynduna katba lah ia ka jingktah ia u paidbah” ong u Superintendent of Police ka EKH Bah Vivek Syiem ha ka sngi Palei.
Kat kum ka jingong jong u, ka kam pyniaid kali ka dei kaba sngewkhia jur eh.
“Ngi la iashong pyrkhat bha halor ka jingpyniaid kali namar ka dei ka jingeh kaba khraw tam ha ka leit ka wan, ka jingiaid ki kali” ula ong.
Halor ka jingbuh bor pahara, ula ong “ Ka jingpynbeit kaba bniah la pynkhreh haba iadei bad ka jingpahara bad ki tactical team bad ki unit bapher bapher kila wan, ka jingdon ki Pulit ban pahara kala kot sha ka 1500 ngut”.
U Myntri kam Pohiing un aiti ia ka khusnam Presidential Order sha ka Tnad Pulit ka Jylla, kawei na ki Tnad Pulit ha ka thain Shatei Lam Mihngi ka ban iohpdiang ia kane ka burom.
