Shillong, K’lyngkot 08 :U Nongmihkhmat ka HNLC sha ka miej iakren iasuk Bah Sadon K Blah ula pyntip ba ka jingiakren iasuk hapdeng ka Sorkar Pdeng, ka Sorkar Jylla bad ka HNLC kan bteng lada ka Sorkar ka kloi ban weng/map noh (amnesty) ia baroh ki kam bymman (case) bala pynngat pyrshah ia ki Nongialam bad ki Dkhot ka seng.
Haba iakren bad ki Nongthoh khubor hadien ba aiti ia ka shithi ka HNLC ba weng noh na ka jingiakren iasuk sha u ksiang ka Sorkar Jylla Bah PS Dkhar, u Bah Sadon Blah uba dei ruh u President ka seng Hynniewtrep National Youth Front (HNYF) ula ong ba ka HNLC ka kwah ba ka dei ban don ka jingpynbeit da ka bor synshar khadar (political solution) halor ka jingdawa jong ki.
“Mynta ka rai ka shong ha ka Sorkar lada ka kwah shisha ba ka jingiakren iasuk kan dang iai bteng” ula bynrap.
U Bah Sadon ula ong ba ka Sorkar kam dei ban shu bud pyrrkhing eh ia ki lynti ka ain (legal process) hynrei ban shim da ka sienjam jong ka bor synshar khadar lad aka kwah ba ka jingiakren iasuk kan jam shakhmat.
Ka HNLC kala rai ban weng noh ialade na ka jingiakren iasuk namar ka jingmynthi ka Sorkar ban map noh ia baroh ki kam bymman bala pynngat ia ki nongialam bad ki dkhot.
U Bah Sadon u pyntip ba bun na ki kam bymman bala pynngat ia ki dkhot ka HNLC ki dei ki kam pynbthei bomb bad kat kum ka jingong u Myntri Khynnah ka Ministry of Home Affairs (MHA) Ajay Kumar Mishra, ym shym la khein ia ki kum ki kam bymman kiba ishyrkhei.
U Bah Sadon ula ong “Lad aka Sorkar Jylla ka weng noh ia baroh ki case, lad aka Sorkar ka map noh ia ki kam bymman baroh, ka lynti ka don ba ka jingiakren iasuk kan bteng namar ka jingtyrwa kala wan na ka HNLC hynrei lada ka Sorkar ka pyneh ban iaid kat kum ka ain, ka bym lah ban long, kane ka jingiakren iasuk kala kut noh”.
“Ki don ar bynta hangne. Ka mat ka long la ka Sorkar kan pynbeit ia kane ka jingeh da kaba pyntreikam ia ka Ain lane la ka Sorkar kan pynbeit ia ka jingeh da kaba pynbeit ha ka bor synshar khadar.Lada ka ong ba ai ba ka HNLC kan wan bad ka ain kan iaid hala ka jong ka lynti, kane ka dei ka lynti ka ain ia ka kynhun ba ialeh thma pyrshah, ia kaba nga sngew ba kam iahap satia. Ban iaid da ka lynti ka ain ia ka kynhun ba ialeh thma pyrshah, nga sngew ba ka dei ka lynti kaba bakla” ong u Bah Sadon.
“Baroh ki thma ha ka pyrthei kiba la jia kim dei kiba la pynbeit da ka lynti jong ka ain, hynrei la pynbeit ia ki da ka jingiakren ha ka bor synshar khadar. Lada ka Sorkar ka ong b aka rai ka shong ha ka HNLC, kane ka dei ka lynti jong ka ain ba ka Sorkar ka pyndonkam hynrei lada ka HNLC ka ong ba ka rai ka shong ha ka Sorkar, ka HNLC ka kwah ban pynbeit da ka bor synshar khadar kaba ka Sorkar kan hap ban shim” ula ong.
Une u Nongialam ka HNYF ula ban jur ruh ia ka jingdonkam ba ka Sorkar kan don ia ka mon ha ka bor jong ka synshar khadar ba kan pyndonkam da u juh u shabuk ia ka HNLC kumba la leh ia ki Sengbhalang ha ka jingiakhih ILP ha u snem 2013.
Ha kajuh ka por, u Bah Sadon ula ong ba ka HNYF ka pynrem jur ia ka Sorkar MDA namar ka jingbym lah ban pynpoi ia ka jingiakren iasuk sha ka jingkut kaba iabeit lang.
 halor ka jingdawa jong ki.){kind=link}