Shillong, K’lyngkot 30 : Ka Iingkashari Meghalaya High Court kala buh jingthoh ia ka Remission Policy 2026, kaba la thaw da ka Sorkar Jylla ban pynsuk bad ban pyniar ia ki kam ban pynlait kloi ia ki koidi.
Ia kane ka Policy bala pynmih ha ka 2 tarik u Kyllalyngkot 2026, la pynsngew da u Advocate General A Kumar hakhmat ka Division Bench kaba kynthup ia ka Chief Justice Revati Mohite Dere bad u Justice W Diengdoh haba tian bishar ia kane ka kam ha ka sngi Thohdieng.
“Ia katei ka Notification la buh syndon ha ka rekod” l pynpaw ka Division Bench ha ka hukum. Ia kane ka mukotduma un shong tian bishar biang ha ka 2 tarik u Rymphang.
Ia ka Remission Policy la pynwandur ha ka 16 tarik u Nohprah 2025 kat kum ka hukum kaba la pynmih da ka High Court kaba iaid katkum ka jingbthah jong ka Supreme Court.
Kane ka Policy kala ioh ia ka jingmynjur na ka Kynhun Myntri ha ka 19 tarik u Nohprah 2025 ha kaba u Myntri Rangbah ka Jylla Conrad K Sangma ula pynpaw da kaba ong, “Ka Kynhun Myntri kala ai jingmynjur ia ka Remission Policy, katkum ka jingbthah jong ka Supreme Court. Baroh ki jylla ki dang trei halor kane ka bynta, ban pynsuk ia ki kam ki jam bad ban ailad ia u Superintendent jong ki Jail ban shim rai ha kaban pynlait kloi noh ia ki koidi”.
Ha kajuh ka por, ki tyllong khubor kila iathuh ba ka Sorkar kala thaw ia ka Sentence Remission Committee ba kan khmih bniah ha kaba iadei bad ka rukom pyntreikam ia ka Policy.
