Shillong, Naiwieng 10: Namar ba ha ki khyndiat sngi kan don ka jingrakhe iaka Diwali ha ka 12 tarik u Naiwieng, na ka liang ki bor pyniaid district jong ka East Khasi Hills kila shah ban die ban thied ia ki bom pataka tang na ki dukan kiba la ioh jingbit na ki bor ba dei khmih.
Ha ka hukum la bthah ruh ba ka jingthang ia ki bom pataka kan long thik naduh ka por 8 baje mynmiet haduh ka por 10 baje mynmiet.
“Ia ki bom pataka la shah ban thang naduh ka por 8 baje mynmiet haduh ka 10 baje mynmiet, kaban iaid katkum ka hukum kaba la pynmih da ka Supreme Court of India ha ka Writ Petition (C) No.28 of 2015-Implementationof Judgement dated 23.10.2018.”, la ong ha ka jingpynbna paidbah.
Nalor kane, la maham tyngeh ban thang ia ki bom pataka ha ki jaka kiba dei ban kynjah jar jar ne Silence Zones, nuksa kaba mut, dei ban jngai 100 mitar na ki hospital, nursing home, primary bad district health care center, jaka pule, ki iingkashari, jaka mane Blei ne kino kino ki jaka kiba la pynbna ba kidei ki Silence Zones da ki bor sorkar.
Ki bor pyniaid District kila kdew ruh ba dei ban die tang ki bom pataka ki bym pynmih tdem bun than. Ka jingshna, jingdie bad ka jingpyndonkam ia ki bom pataka kiba pyniasohlang baroh, kadei kaba la khang pyrshah namar ba ki pynmih bun palat ia ka tdem, jingsawa bad kumjuh ruh ia ki jaboh.
Ha ka jingpynbna paidbah la bynrap ruh, ba ka jingdie ne jingpyndonkam ia ki bom pataka kiba sawa jam bha ne kiba palat iaka 125 dB (Al) ne 145 dB (C) pk kaba 4 mitar na ka jaka kaba thang kadei kaba la mana tyngeh.
