Shillong Nailur 19: U MLA ka North Shillong na ka seng Voice of the People Party (VPP) u Bah Adelbert Nongrum hynne ka sngi Baar, ula pan jingtip ia kaei kaba ka sorkar kala leh pyrshah ia u Deputy Commissioner jong ka West Khasi Hills uba la ai jingbit ban pynlong ia ka jingiakob khwai dohkha, kaba la pynmih iaka jingdheng kali kaba la lam sha ka jingiap jong i khunlung iba dang shu kha ha Pamphyrnai, Ksehkohlong.
Haba wanrah iaka Zero Hour Notice hapoh ka iingdorbar thawai, u Bah Nongrum ula ong “Kiei ki sienjam kiba la shim pyrshah ia u DC ka West Khasi Hills uba la ai jingbit ban ban pynlong ia ka jingiakob khwai dohkha khlem da shim ia ka jingkitkhlieh ban pynneh ia ka shongsuk shongshngaiñ bad ruh pyrshah ia u Superintendent of Police (SP) ka West Khasi Hills uba la shah ia ki pulit ban iadonbynta lang bad ki nongpyniaid ha ka jingsam ia ki khusnam bad jah pat na ka jingpyniaid ia ki kali bad ban tem ia ki paidbah”.
Ula ong, ba ha ka 16 tarik u Nailur, ka longkmie kala hap ban kha ia i khunlung khlem ka jingdon jong ki nongai jingsumar hapoh ka kali paidbah, haba ka kali kala sahkut haduh 3 kynta ha ka jingdheng kali kaba la mih na ka jingpynieng ia ki kali ha baroh arliang ha shi lynter jong ka surok bad ki paidbah kim shym la ailad ia ki kali ban iaid ha ka jingpynlong ia ka jingiakob khwai dohkha kaba khlem don ka jingpyrkhing, kaba la pynlong ha ka pung Pamphyrnai, West Khasi Hills.
U Bah Nongrum ula ong, la shem ba ki bor pyniaid district kila leh bakla ha ka jingai jingbit khlem da shim pat ia ka jingkitkhlieh ban pynneh ia ka shongsuk shongshngain bad la iohi ruh ba ki pulit kila donbynta lang ha kaban sam ia ki khusnam katba kila jah pat, ha kaban tehlakam ia ki paidbah bad ia ki kali kiba la pynthud ia ka leit ka wan ha ka surokbah Shillong-Nongstoin kaba don hajan jong ka jaka kaban pynlong ia ka jingiakob khwai dohkha.
Une u MLA ula kylli ia ka sorkar jylla, la ka jingpynlong ia ki jingiakob khwai dohkha kiban wan ym tang ha West Khasi Hills bad ha kiwei ki District ruh yn pynsangeh noh, katba ym pat lah ban don ia ki jingpyrkhing kiba biang da ka aiñ, khnang ba kum kitei ki jingjia kin ym jia shuh, kaban buh ha ka jingma iaka koit ka khiah bad ia ka jingshngaiñ jong ki paidbah.
“Hato ka sorkar ka don jingtip ia ka jingktah jong ki jingiakob khwai dohkha kaba la pynlong ha man la ka sngi Saitjaiñ, ha kaba ka jingioh shi taiew jong ki longing ha nongkyndong, kiba la kyrni haka jingshah khring jong ka khusnam kaba T.50 Lak ha man la ka jingiakob bad ki hap ban siew ia ka bai rung ha ka jingiakhun kaba long T.2000 haduh T.3000 ia kaba ka sorkar lehse kam ju ioh eiei pat kum ka khajna” ula ong.
