Shillong, Nailur 19: Ka sorkar jylla lyngba ka tnat jngohkai pyrthei kala phah 30 ngut ki samla ki ban leit shah hikai pyntbit ialade naka bynta ban long kum ki nongialam lynti iaki nongwan shakai pyrthei lane ki Trek Leaders.
Ka jingshah hikai pyntbit iaki nongialam lynti lane ki Trek Leaders kan long ha Darjeeling naduh 20 haduh 30 tarik mynta u bnai naka bynta ka Batch ba nyngkong, ka Batch ba ar bad b alai kan don 60 ngut ki samla ki ban shah hikai pyntbit naduh 27 tarik mynta u bnai haduh 6 tarik Risaw 2023 ha Uttarakhand bad ha Darjeeling katba ka Batch ba saw kan kan sdang naduh 3 tarik haduh 12 tarik Risaw.
Kine ki samla na Meghalaya kiba la mih na Shillong ban shah hikai pyntbit sha Darjeeling ki kynthup mar 3 ngut naka shnong Pashum, Laitsohum, Diwon, bad mar 5 ngut naka shnong Wahkhen, Laitiam, Nongblai, mar 1 na Mawlyngbna, Lapalang bad 4 ngut naka shnong Mawten.
Haba kren ha kane ka sngi u Myntri ka kam jngohkai pyrthei bah Paul Lyngdoh ula ai mynsiem ia ki 30 ngut ki samla kiba la mih na Shillong ban shah hikai pyntbit ha Darjeeling ban long kum ki Trek Leaders.
U bah Paul ula kyntu iaki samla ba kin minit bad ba kin pynleit jingmut ialade haka por ba ki dang shah hikai pyntbit.
“Ka Adventure tourism kadei kaba donkam bha haka kam jngohkai pyrthei ha Meghalaya. Ka long kaba sngewtynnad ba haduh 25 tylli ki Trails lane ki jaka iaid kjat la dep ban ithuh ha Meghalaya bad ha ki snem ban wan ka sorkar kan ialeh ban ithuh khambun ki lynti iaid kjat lane ki Trail. Ka sorkar kala pynlut pisa naka bynta ban iarap ia phi ba phin kiew bha ha kane ka jingleit shah hikai pyntbit ban wanrah iaki buit ban pyndonkam hapoh ka jylla ban kyntiew iaka kam jngohkai pyrthei” la ong u bah Paul.
