Shillong, Nailur 28 : U Nongialam ka United Democratic Party (UDP) Bah Paul Lyngdoh hynne ka sngi Balang ula buh jingkylli ia ka All India Trinamool Congress (AITC) kaba don ha ka Liang Pyrshah ba kumno ka sngewshong hok ban kawang ia u maw ba nyngkong sha ka Sorkar Meghalaya Democratic Alliance (MDA) ba ialam da ka National People’s Party (NPP).
U Bah Paul Lyngdoh ula kynthoh ia kane haba kdew ia ka jingkynthah narsaw jong ka AITC ba manla ka sngi ia ka Sorkar MDA kaba poi ha u pud ba ka Baible ka sot ia ka jingkren u Jisu “ Uta uba khlem pop napdeng jong phi, to un lynthem ia u maw nyngkong ha ka”.
Kane ka jingkynthoh kala mih ruh shisngi hadien ba u National Spokesperson ka AITC Saket Gokhale, ula kob ia u Myntri Rangbah ka Jylla Conrad K Sangma ban jied ia uno uno u Myntri ban iatai nia hakhmat u paidbah halor ka jingkynnoh bym beit ka rukom synshar khaddar ka sorkar MDA.
“Baroh ki don ia ka hok ban ong kat kaba ki mon hynrei hato u sngew shonghok ban lynthem ia u maw nyngkong…kane ka dei ka jingkylli phi hap ban kylli ia une u briew ba un jubab” ong u Bah Paul haba iakren bad ki nongthoh khubor.
Une u MDC ka Jaiaw ula ong ba um shym ong satia ba ka MDA ka dei ka “Kynhun ki Angel” namar kala pulom ruh ha ka jingtreikam ha kiba bun ki bynta.
“Ngam ong ba ka MDA ka dei ka kynhun ki angel, da lei lei ruh em, ki don katto katne ki bynta ba ka khlem lah ban treikam, katto katne kaba ka khlem lah ban pynurlong kumba la khmih lynti, ka jingjur ka jingbamsap hynrei haba phai sha mano ba kynthoh, nga wan biang sha ka jingkylli hato phi sngew songhok ban lynthem ia u maw nyngkong bad ong hey phin dei u nongleh pop” ula ong.
Ka AITC kala kylla long ka Liang Pyrshah ha Iingdorbar Thaw Ain hadien ba 12 ngut ki MLA ka Congress kila leit ban pyniasoh ia ka ha u snem bala lah.
