Shillong, Nohprah 14: Lada ka All India Trinamool Congress (AITC) kam lah ban pynurlong iala ki jingkular hapoh ka jylla West Bengal ba ka synshar mynta la bun snem, kumno kan lah ban pynurlong iaki jingkular ba ka kular naka bynta ki longkmie ka Meghalaya.
Ia kane la ong da u Myntri ka tnat ka koit ka khiah u James Sangma haba kren halor ka jingkular ka Chairperson ka AITC Mamata Banerjee kaba dei ruh ka Myntri Rangbah ka West Benga,l ban ai mar T.1000 iaki longkmie jong ka Meghalaya lada ka AITC ka wan ha ka bor hadien ka ilekshon 2023.
U James Sangma u la ong ba kane ka jingkular ka AITC kadei tang ka buit ilekshon bad ban ioh ia ka jingshaniah jong ki paidbah khamtam ki longkmie ka Meghalaya namar ka ilekshon 2023 ruh kala jan artad.
“Haba kut ki paidbah kin sa bishar namar naka liang ka AITC kaba synshar iaka jylla West Bengal da ki phew snem haduh mynta kam shym la lah ban pynurlong iaki jingkular hala ka jylla lajong, te kumno ki paidbah ka Meghalaya kin shaniah ba ka AITC kan lah ban pynurlong iaki jingkular ha Meghalaya” la ong u James.
U James u la ong ba ka AITC kadei ban shim iaka nuksa ia kaei ka ba ka sorkar synroplang ka Meghalaya Democratic Alliance (MDA) ka la leh naka bynta ki paidbah ka Meghalaya namar u Myntri Rangbah ka jylla Conrad K Sangma u la pynurlong ia shibun ki jingkular ba ka sorkar MDA kala kular hakhmat ki paidbah ka Meghalaya.
U la ong ba ka sorkar MDA ka la leh shibun kiei kiei iaki paidbah ka jylla watla ka jingpynurlong iaki jingkular kam shym la dei baroh 100% hynrei ki paidbah ka Meghalaya ki sngewthuh bad ki tip ba ka sorkar jylla kala wanrah shibun ki jingmyntoi iaki paidbah bad iaka jylla baroh kawei.
“Ban iaka ba shu kular, kan bha iaka AITC ban kan pynurlong shwa ia kiwei kiba kala kular naka bynta ki paidbah hapoh West Bengal namar haduh mynta kane ka juh ka party kaba la wan ban kular iaki paidbah ka Meghalaya kam shym la bat iala ka jingkular” la ong u James.
