Shillong, Jylliew 28 : Ka North East Students’ Organization (NESO) hynne ka sngi Balang, kala buh jingkylli ia ka Sorkar Pdeng ioh ba ka don ia ka “plan buhrieh” da kaba shah ia ka jingjia iausnam ba kan iai bteng hapoh ka Jylla Manipur.
Kane ka jingkylli kala mih ha ka jingialang thang mombiti bala pynlong da ka Khasi Students Union (KSU) ha Khyndailad, kum ka dak ban sngewlem ia ki nongshongshnong ka Jylla Manipur, kiba la im hapdeng ka jingshongsyier bad kylla phetwir naduh ba khie ka thma iapher jaidbynriew, kaba sdang naduh ka 3 tarik u Jymmang.
“ Lada ka kam iaumsnam kam pat sangeh ha kane ka khyllipmat ba mynta, ka pyni ba ka Sorkar India ka don ia ka plan ba buhrieh ha lyndet ka jingailad ia ki kam iaumsnam ba kan iai bteng ha Jylla Manipur” ong u Chairman ka NESO Bah Samuel B Jyrwa haba iakren bad ki nongthoh khubor.
“Hooid ngim tip kaei kata ka plan buhrieh hynrei ka don hi katto katne ki kam jong ki bor ba nabar kiba buh jingma ia ka bha ka miat jong ki paid riewlum ki Jylla bapher bapher ka thain Shatei Lam Mihngi” ula bynrap.
Haba thalain ia ka Sorkar Jylla bad Sorkar Pdeng ba kim lah ban tehlakam ia ki kam iaumsnam ha Manipur, u Bah Samuel ula ong “Baroh ar ki Sorkar (sorkar Jylla bad sorkar pdeng) kila pheil ha ka jingiakhun pyrshah ia ki kam iaumsnam bad ka Sorkar India khlem ka jingpynjari ia ka President Rule, ki lah ban don palat 50,000 ngut ki shipai ha ka Jylla Manipur, kane ka la biang palat ban tehlakam ia ki kam iaumsnam lada ki kwah ban pynkut noh”.
U Bah Samuel ula ong ba kane ka buh ia u dak jingkylli uba khraw bha halor ka jingkotbor jong ki shipai ban tehlakam ia ka jingsuk hapoh ka Jylla Manipur.
U Bah Samuel ula pynpaw ruh ia ka jinglyngngoh halor ka jingsngap jar jar jong u Myntri Rangbah Duh Narendra Modi halor ka jinglong jingman ha Manipur bad ong “Ka long kaba shaiong bad kyndit ba u Myntri Rangbah Duh ka Ri uba jus mat bha ban kynthoh ia kino kino ki kam kiba ktah ia ki Jylla hapoh ka Ri, u dang iai sngap jar kat haduh mynta watla kane ka jingpluh ka Manipur kala jan jan kot 2 bnai”.
“Ngi kyrpad bad khot ia u Myntri Rangbah Duh ka Ri ba un kren eiei halor kane ka jingjia bad ban shim ia ki sienjam kiba treikam khnang ban lah pynkut noh ia ka jingiaumsnam bad ban iapynbeit ia baroh ki jingeh kiba lah ban mih na kane ka jingiakynad” ula bynrap.
Haba pynpaw ba ka por kala dawa ba dei ban wanrah pat ia ka jingsuk ha Manipur, une u Nongialam ka NESO ula ong ba kine ki jingiathong mombiti ki dei kiba la pynlong ha baroh ki Nongbah jong ka thain Shatei Lam Mihngi kynthup ha Tura, kaba la pynlong da ka Garo Students Union, ban khot ia ka jingsuk ha Manipur bad ban pynkut noh ia baroh ki kam iaumsnam ha Manipur.
U Bah Samuel u pyntip ba ka kynhun jong ka NESO kan sa leit iuhkjat shen sha Manipur bad kan sa iakynduh iaki Nongialam na baroh arliang mamla jong ka Jaidbynriew Meitei bad ki Kuki.
“Ngi ngeit ba lyngba ka jingiakren bad ki, ngin lah ban wanrah ia katto katne ka jinglong ba jai jai ha ka Jylla Manipur” ula bynrap.
