Shillong, Jylliew 28: Ka Khasi Students’ Union (KSU) ha ka sngi Balang kala buh jingkylli iaka jingpulom jong ka sorkar jylla ban pyntreikam iaka Meghalaya Residents Safety and Security Act, 2016 kaba thmu ban talasi iaka jingwan rung kyrthep ki mynder ri.
“Ngim tip ia kaei kaba la jia iaka MRSSA,” ong u President ka KSU u Lambokstarwell Marngar haba iakren bad ki nongthoh khubor.
Ula ong ba ka sorkar jylla kala pynthikna ban tei iaka khyrdop talasi ha Umling, Ri Bhoi District ban talasi ia ki mynder ri kiba wan rung shapoh ka jylla hynrei kaba sngewthamula ka long ba kane ka ka khyrdop kala kylal long noh kum ka khyrdop COVID Testing Centre.
Ula ong ba man ka sngi ki mynder ri ki wan rung shapoh ka jylla bad ka pork ala dei ba ka sorkar jylla kan kyndit bynriew noh na ka jingiohthiah lyngngai bad ban leh mardor ia kaba donkam.
“Lada ka sorkar jylla ka pulom ban pyntreikam ia kino kino ki lad ki lynti ban tehlakam iaka jingwan rung kyrthep ki mynder ri, kam dei ban kynnoh ia ki sengbhalang ba ki shim iaka aiñ hala ki jong ki kti” la byrngem u nongialam ka KSU.
Ula buh jingkylli ruh ia k asorkar jylla bad iaka sorkar pdeng ba kin kren da kaba shai kdar da kaba ong ‘Hooid’ ne ‘Em’ ia ka jingdawa ban pyntreikam ia ka ILP ha ka jylla.
Ha kaba iadei bad ka jingiapynbeit ia u pud usam hapdeng ka Meghalaya bad Assam, u Nongialam ka KSU ula ong ba ka sorkar kala dep shim ia ka rai ban kynthup lang ia baroh 3 tylli ki district council ha ki Regional Committee ban wad ia ki lad ki lynti ban pynbeit ia u pud u sam ha ki 6 tylli ki jaka kiba don hapdeng ka jingiakajia pud.
“Ngi kwah ba ka sorkar kadei ban pynthikna ba ka jingpynbeit pud kadei kaban pdiang da ki paidbah kiba sha ha khappud bad kam dei pat ban long ha kata ka lynti ban pynmih ummat kthang ia ki paidbah” ong u President ka KSU.
