Shillong, Nailur 03: U Nongialam ka Liang Pyrshah Dr Mukul Sangma ha ka sngi Balang, ula kynthoh pyrshah ia ka sorkar jylla kaba la tyrwa ban wanrah ia ka jingkylla ha ka rukom pyniaid ia ka pla tyngka bad ban siew ia ka tulop ki nongtrei jong ki Autonomous District Council (ADC) haba buh jingkylli ia ka nongrim kat kum ka Riti Synshar ka Ri bad ia ka jingthmu kaba sha lyndet.
Haba iakren bad ki nongpathai khubor u Dr Mukul Sangma ula ong ba kano kano ka jingpynkylla ia ka rukom pyniaid ia ka pla tyngka dei ban bud ryntih katkum ka riti synshar ka ri India bad ka jingpynkup bor jong ka Finance Commission.
“Baroh kaei kaei kaba ka sorkar ka leh ka hap ban long hapoh jongka jingpynkup bor jong ka riti synshar ka ri. Kam lah ban long da ka jingangnud ne jingpyrkhat kaba shimet jongno jongno ruh” ula ong.
U Myntri Rangbah barim ka jylla ula pynpaw ia ka jingsngewkhia ia ka jingshim rai ka sorkar ban siew tulop noh ia ki nongtrei jong ki District Council naduh ka 1 tarik u Naiwieng ka lah ban ktah ia ka bor treikam jong ki District Council, kaba la ioh ia ka jingiada na ka riti synshar ka ri bad ula buh jingkylli la ka sorkar kala dep ban iasyllok shwa bad ki District Council ka jylla hashwa ban shim ia katei ka rai bad la kane ka jingthmu kan ym niewpoh noh ia ka bor bala pynkup da ka riti synshar.
U Mukul Sangma ula kynnoh ruh ba kane ka jingthmu ka sorkar ka lah ban don eiei kaba buhrieh na sha lyndet ne “hidden agenda” ban pyntroin ia ki District Council, ha ka jaka ban pynkhlain ia ki.
“Hato (sorkar) ka don ia kano kano ka buit kaba sha lyndet ban pyntroin suki suki ia ki ADC. Namar wat kane ka jingtyrwa jong ka sorkar jylla ba kan siew hi noh ia ka tulop jong ki nongtrei jong ki ADC naduh ka 1 tarik u Naiwieng, kadei ka jingshimrai ka bym pura. Hato kam dei? Lada ki ong ba naduh ka 1 tarik u Naiwieng, kin leh ia katei, kadei ka jingshim rai ka bym pat biang pura” ula ong.
“Nga dap da ka jinglyngngoh ba badno kila iakren ia kane ka mat? Hato kila iakren bad kiwei pat ki ADC? Em, kumta kila sdang ban tuklar ia u pud bad ia ka bor jong ki ADC kaba long pyrshah katkum ka jingpynkup bor da ka riti synshar ka ri” la ong u Mukul Sangma bad ka bynrap “Ka long kaba sngewthamula ba ka sorkar mynta kan ong ba ki nongtrei ki jong phi kin dei hi ki nongtrei jong phi bad phi dei ki ‘Autonomous Body’ bad ngam don eiei ban leh bad ka hynrei ha kajuh ka por pat kila ong, ngin ai ia ka tulop jong ki nongtrei khlem ka jingtip ka jong phi. Ka long thik kumba phi don ia ki nongtrei hapoh iing bad kiwei pat kin siew ia ka tulop jong kitei ki nongtrei hapoh jong ka iing”.
Ha kaba iadei bad ka jingmad jingeh ki nongtrei ka GHADC ki bym shim la ioh ia ka tulop la 44 bnai, u Mukul Sangma ula kynnoh ba ka sorkar kala kyntait ia ka jingkitkhlieh bad paw kumba kala khein sting ia katei ka kam.
“Ki nongtrei ka GHADC kim shym la ioh ia ka tulop ka jongki mynta la palat ia ka 44 bnai, Hapoh jong kine ki jingjia, hooid kila don ki jingshim ia ki sienjam ban pynthikna ba ki ADC ba kin lah ban jam shaphrang ia kane ka jingeh ia shipor bad ngi la shim ia ki sienjam ban pynthikna ba kum katei ka jingjia kam ym iai jia biang hynrei ha kawei pat ka liang ka sorkar kala ong, ba kam lah ban leh eiei. Kila kyntait ia ka jingkitkhlieh ka jongki bad thet ia la ki kti. Kane kadei kaei kaei kaba ym lah ban pdiang satia namar ba ka sorkar kadei ban sngewthuh ia ka jinglong jingman jong kane ka jingjia bad ban sngewthuh ruh ia ka jingkongsan jong ki ADC,” ula ong.
Katkum ka jingong ka jongu, ka sorkar kadei ban shimkhia ia ki jingtynjuh bad ban leh eiei ban iada na kino kino ki jingjia.
 haba buh jingkylli ia ka nongrim kat kum ka Riti Synshar ka Ri bad ia ka jingthmu kaba sha lyndet.){kind=link}